०५ साउन २०८३, मंगलबार
सर्वोच्च अदालतमा इजलास बहिस्कार गरेर छलफलमा जुटेका न्यायाधीशहरूको बैठकमा बन्दीप्रत्यक्षीकरण र थुनुवासम्बन्धी मुद्दाको सुनुवाइ गर्ने विषयले प्रवेश पाएको छ ।
प्रधानन्यायाधीश चोलेन्द्रशमशेर जबराको राजीनामा मागेर पाँच दिनदेखि सर्वोच्चका न्यायाधीशहरूले कुनै पनि मुद्दाको सुनुवाइ गरेका छैनन् ।
न्यायाधीशहरूको बैठकमा बिदामा रहेका दुई जना न्यायाधीशहरू अनिल सिन्हा र सपना प्रधान मल्ल आइतवार आइपुग्ने र उनीहरूसमेतको सहभागितामा थप निर्णय गर्ने सहमति बनेको एक न्यायाधीशले लोकान्तरलाई बताए ।
प्रधानन्यायाधीशको राजीनामा मागिरहेका १५ जना न्यायाधीशलाई विपक्षी बनाएर परमादेशको आदेश माग गरी सर्वोच्च अदालतमा रिट निवेदन दर्ताका लागि पेश भएको छ । उक्त रिटमा न्यायाधीशहरूले इजलास बहिस्कार गरेर बन्दीप्रत्यक्षीकरण र थुनुवासम्बन्धी मुद्दाको समेत सुनुवाइ नगरेर मानव अधिकार हनन गरेको आरोप लगाइएको छ ।
