२३ जेठ २०८३, शनिबार
अफगानिस्तानको तालिबान सरकारका गृहमन्त्री सिराजुद्दीन हक्कानीका मुख्य सैन्य रणनीतिकार कमान्डर हमदुल्ला मुखलिस आत्मघाती आक्रमणमा मारिएका छन् ।
मंगलवार भएका दुईवटा बम विस्फोट तथा गोलीकाण्डको घटनामा २५ जनाको मृत्यु भएको छ र मुखलिस पनि त्यसमा परेका छन् ।
मुखलिस तालिबानको विशेष बल बद्री ब्रिगेडका कमान्डर थिए । त्यही ब्रिगेडले काबुलमा सुरक्षाको जिम्मेवारी लिएको छ ।
तालिबान कमान्डरको मृत्युले हक्कानी नेटवर्कलाई ठूलो झड्का लागेको छ ।
यस आक्रमणको जिम्मेवारी कसैले नलिएको भए पनि आईएसकेपीका आतंकवादीहरूले गराएको मानिएको छ ।
बन्दूकधारीहरूको समूहले काबुलमा रहेको सबभन्दा ठूलो सैन्य अस्पतालमा आक्रमण गरेका थिए । तालिबान लडाकूहरूको समूहले आक्रमणकारीहरूलाई मारेका थिए ।
तालिबानका प्रवक्ता जबीहुल्ला मुजाहिदले विस्फोटका कारण ४०० शय्या भएको सरदार मोहम्मद दाउद खान अस्पतालको प्रवेशद्वारमा भएको बताए । आक्रमणकारीहरूलाई १५ मिनेटभित्र मारिएको उनले बताए ।
तालिबानको विशेष बललाई हेलिकप्टरमार्फत अस्पताल परिसरमा एयर ड्रप गरिएको थियो । आक्रमणकारीहरूलाई अस्पताल परिसरमा प्रवेश गर्न नदिएको र गेट वा परिसरमै मारिएको जानकारी मुजाहिदले दिए ।
