०४ साउन २०८३, सोमबार
महाधिवेशन प्रतिनिधि चयनमा सहमति जुट्न नसकेपछि पश्चिम नवलपरासी एमालेमा निर्वाचन हुने भएको छ ।
नेकपा एमालेको १०औं राष्ट्रिय महाधिवेशन अन्तर्गत हुने महाधिवेशन प्रतिनिधि चयनका लागि शुक्रवार सहमति नजुटेपछि शनिवार निर्वाचन हुने भएको हो ।
जिल्लामा २ संघीय निर्वाचन क्षेत्र छन् । १ वटा निर्वाचन क्षेत्रबाट २ जना महिला र ४ खुला महाधिवेशन प्रतिनिधि चयन हुनेछन् । जिल्लाका २ वटा निर्वाचन क्षेत्रबाट कूल ४ महिलासहित १२ जना महाधिवेशन प्रतिनिधिका लागि निर्वाचन हुन लागेको हो ।
जसमा ११ जना महिला र २० जना खुला गरी कूल ३१ जनाको उम्मेदवारी परेको छ । उम्मेदवारी परेको निर्वाचन क्षेत्रअनुसार क्षेत्र नम्बर १ बाट ५ महिला र ९ खुलातर्फ छन् । यहाँ २८ सय ७५ मतदाता छन् ।
निर्वाचन क्षेत्र नम्बर २ बाट ६ महिला र ११ जना खुलातर्फ उमेदवारी परेको छ । यहाँ ३८ सय ७६ मतदाता छन् ।
दलिततर्फ जिल्लाबाट २ जना प्रतिनिधि चयन हुने प्रावधानअनुसार पार्टी अध्यक्ष तुलसी पासी र सदस्य राजु हरिजन निर्विरोध भएका छन् ।
उम्मेदवारी दिनेमा प्रदेशसभा सदस्य, मेयर र उपमेयरसहित जिल्ला र प्रदेश स्तरका नेतासम्म छन् । संघीय निर्वाचन क्षेत्र नम्बर १ बाट खुलातर्फ प्रदेशसभा सदस्य दीपेन्द्र अधिकारी, बर्दघाट नगरपालिकाका मेयर धीरज शर्मा, सुवासचन्द्र जिसी, एकदेव पाण्डे, रामप्रसाद अर्याल, बद्री खनाल, ठोपबहादुर सिंह ठकुरी, निमानन्द न्यौपाने र पुण्यप्रसाद पौडेल छन् ।
महिलातर्फ देवी पौडेल, सिन्धु जलेसा, राधिका शर्मा भट्ट, सरिता खनाल भुसाल, मधुमाया पौडेल छन् ।
निर्वाचन क्षेत्र नम्बर २ बाट खुलातर्फ सुनवल नगरपालिकाका उपमेयर दधिराम अर्याल, जिल्ला सचिव थानप्रसाद गैरे, केशवप्रसाद भण्डारी, डोलराज भण्डारी, वीरेन्द्र यादव, लेखनाथ खरेल, रामचन्द्र भण्डारी, सूर्यप्रसाद दुबे, कृष्णप्रसाद बगाले, राजन कुमार आचार्य र बद्रिमान श्रेष्ठ छन् ।
महिलातर्फ प्रदेशसभा सदस्य भगवती भण्डारी, तारा आचार्य, सरस्वती सुवेदी, विमला अर्याल, रिंगला यादव र लक्ष्मी क्षेत्री छन् ।
निर्वाचन क्षेत्र नम्बर १ को बर्दघाटको पुनर्वास र क्षेत्र नम्बर २ को सुनवलको स्वाठीमा मतदान केन्द्र तोकिएको छ । राष्ट्रिय महाधिवेशन मंसिर १०–१२ गते चितवनमा हुँदैछ ।
