कपिलवस्तु (गोरुसिङ्गे), १० असार– राजनीतिक दलप्रति युवाहरुमा वितृष्ण बढेको विश्लेषण भइरहँदा दोस्रो चरणको स्थानीय तह निर्वाचनमा दलहरुको प्रचार प्रसारमा भने प्लस–टू पुस्ता (किशोर–किशोरी)को छुट्टै आकर्षण देखिन्छ । दोस्रो चरणको स्थानीय तह निर्वाचन हुने १, ५ र ७ नम्बर प्रदेशमा चुनावी गतिविधिले सबैभन्दा बढी प्लस–टू पुस्तालाई नै छोएको देखिन्छ । चुनावी गतिविधि सम्बन्धी स्थलगत रिपोर्टिङमा रहेको लोकान्तरको टोली ५ नम्बर प्रदेशको रुपन्देही र कपिलवस्तु जिल्ला पुग्दा प्लस–टू पुस्ताका किशोर किशोरीहरु आ–आफ्नो दलको चुनावी प्रचारमा सक्रियतापूर्वक सहभागी भएको देखियो । खासगरी संसदको सबैभन्दा ठूलो दल नेपाली कांग्रेस र दोस्रो ठूलो दल नेकपा एमालेको प्रचार प्रसारमा प्लस–टू पुस्ताको उल्लेख्य सहभागीता छ । साना भ्यानदेखि ठूला बसहरु रिजर्भ गरेर विभिन्न राजनीतिक दलले चुनाव प्रचार प्रसार गरिएका छन् । चुनावी प्रचारका लागि रिजर्भ गरिएका ठूला तथा साना गाडीका छतमा बसेर तन्नेरीहरुले आफ्नो पार्टीको पक्षमा नारा लगाइरहेका छन् । ५ नम्बर प्रदेशअन्तर्गत पूर्व–पश्चिम राजमार्गमा अचेल सार्वजनिक सवारीका साधनभन्दा दलहरुले चुनावी प्रचारका लागि रिजर्भ गरेका ठूला तथा साना सवारीको चाप बढी छ । प्लस–टू पुस्ता नै दलहरुको चुनावी प्रचारमा सक्रिय भएपछि गाउँमा चुनावी माहोल तातेको छ । मनोनयन दर्ताको दिन बम विस्फोट भएको कपिलवस्तुको बाणगंगा नगरपालिकामा अहिले शान्तिपूर्वक र उल्लासपूर्ण वातावरणमा चुनावी गतिविधि भइरहेका छन् । युवाहरुको जमात चुनावको पक्षमा देखिएपछि चुनाव विथोल्ने अभियानमा रहेकाहरुको अभियान असफल भएको छ ।
