१४ असार २०८३, आइतबार
भारतका राष्ट्रपति रामनाथ कोविन्दले पोहोर साल गलवान उपत्यकामा चिनियाँ सैनिकहरूसँग भएको भिडन्तमा शहादत पाएका भारतीय सैनिकहरूलाई मरणोपरान्त सम्मान मंगलवार दिएका छन् ।
कर्नेल बी सन्तोष बाबुलाई मरणोपरान्त महावीर चक्र प्रदान गरिएको छ भने अन्य पाँच सैनिकलाई वीर चक्र दिइएको छ ।
पाँचमध्ये चारलाई मरणोपरान्त वीर चक्र सम्मान दिइएको हो । महावीर चक्र भारतको दोस्रो सबभन्दा ठूलो सैन्य सम्मान हो भने वीरचक्र तेस्रो ठूलो सम्मान हो ।
नायब सुबेदार नुदुराम सोरेन, हवल्दार के पालनी, नायक दीपक सिंह र सिपाही गुरतेज सिंहलाई मरणोपरान्त सम्मान दिइएको हो । हवल्दार तेजिन्दर सिंह वीरचक्र पाउने जीवित सैनिक हुन् ।
गलवानमा भएको उक्त भिडन्तले भारत र चीनबीचको सम्बन्धमा तिक्तता ल्याएको छ । गलवान उपत्यकाको गश्ती विन्दु १४ नजिक सात घन्टा भएको घातक भिडन्तमा भारतका २० जना सैनिकको ज्यान गएको थियो ।
