नेकपा एमालेको दशौं महाधिवेशन बन्दशत्रको अध्यक्ष मण्डलका अध्यक्ष केपी शर्मा ओलीले नेतृत्वको लागि चुनावी प्रतिष्पर्धा गर्न चाहनेको अधिकार नखोसिने बताएका छन् ।

चितवनको सौराहामा जारी एमाले महाधिवेशनको बन्दशत्रमा नेतृत्व चयनको प्रक्रियालाई लिएर भीम रावलले असन्तुष्टि जनाएपछि ओलीले चुनाव लड्न पाउने अधिकार नखोसिने बताएका हुन् । 

बन्दशत्रले पदाधिकारी तथा केन्द्रीय सदस्यको नाम प्रस्ताव गर्ने जिम्मा केपी ओलीलाई दिएको थियो ।

सो प्रस्तावमा आपत्ति जनाउँदै रावलले पार्टी विधानले व्यक्तिलाई त्यस्तो अधिकार नदिएको बताएका थिए । रावलले अध्यक्षमा उम्मेदवारी दिने आफ्नो अडान कायम रहेको बताएका थिए ।

‘उहाँले मनोनयन नै गर्नु भएको छैन, कहाँबाट फिर्ता लिनु । चुनाव लड्नु भन्नु भएको छैन । कसैले उम्मेदवारी दिएन भने कसरी लड्नु हुन्छ ? सहमतिको प्रयास गर्छौँ भनेको हो । नेतृत्व चयन गर्दा निर्वाचित हुने सर्वसम्मति र प्रतिस्पर्धाको विधी हुन्छ । जो चुनाव लड्छु भन्छ के का लागि चुनाव लड्ने भन्ने विचार गर्नु पर्छ,’ ओलीले भने, ‘प्रतिष्पर्धा गर्ने कसैको अधिकार खोसिँदैन, विधान मिचिँदैन । हामी लोकतान्त्रिक अभ्यास गर्ने हो । कसैमाथि थिचो मिचो हुँदैन ।’ 

ओली बोलेपछि दोस्रो दिनको बन्दशत्र सकिएको छ । आइतवार बिहान १० बजे शुरु हुने बन्दशत्रमा ओलीले पदाधिकारी सहित केन्द्रीय समितिको सूची प्रस्ताव गर्नेछन् । सहमति नभए भोलि मतदान हुनेछ ।