भारतको पञ्जाब विधानसभा निर्वाचनमा हिन्दू भोट बैंकले कांग्रेस पार्टीको टेन्सन बढाएको छ । 

सरकार र संगठनमा सिख अनुहार छ । दिग्गज हिन्दू अनुहार अगाडि आएको छैन । 

यस्तो अवस्थामा मुख्यमन्त्री चरणजीत चन्नीले पञ्जाबका सरकारी विद्यालयहरूमा संस्कृत पढाइने घोषणा गरेका छन् । त्यसलाई वैकल्पिक विषयका रूपमा पाठ्यक्रममा राखिनेछ । 

त्यसबाहेक रामायण, महाभारत र श्रीमद्भगवद्गीतामाथि अनुसन्धान गर्न विभिन्न केन्द्रहरू पनि खोलिनेछन् । 

मुख्यमन्त्री चन्नी आफैंले संस्कृत सिकेर महाभारतमा पीएचडी गर्ने भएका छन् । 

पञ्जाबमा ३८.४९ प्रतिशत हिन्दू भोट छ । १० प्रतिशत जट्टसिख भोटका लागि नवजोत सिंह सिद्धू कांग्रेस प्रदेश अध्यक्षका रूपमा छन् । ३२ प्रतिशत दलित भोट बैंकका लागि अनुसूचित जातिका मुख्यम्त्री चन्नी आफैं छन् । 

तर हिन्दू भोट बैंकका लागि कांग्रेससँग दिग्गज नेता छैन ।

पञ्जाब कांग्रेसका ठूला हिन्दू नेता सुनील जाखड हुन् । उनी पार्टीसँग रिसाएर घरमा बसेका छन् । पञ्जाब कांग्रेस इन्चार्ज हरीश चौधरीmे उनलाई फकाउने कोशिश गरेको भए पनि कुरा मिलेको छैन ।

हिन्दू भोट बैंकमा भाजपा र क्याप्टेन अमरिन्दर सिंहको राम्रो पकड छ । यिनीहरू मिलेमा कांग्रेसलाई शहरी क्षेत्रमा समस्या पर्नेछ । अमरिन्दरले भाजपासँग सीट शेयर गर्ने बताइसकेका छन् ।