०५ साउन २०८३, मंगलबार
नेकपा माओवादी केन्द्रले सातवटै प्रदेशमा मंसिर २५ गते प्रदेश अधिवेशन गर्दैछ । प्रदेश १ मा तीनजना आकांक्षी देखिएका छन् ।
सुरेशकुमार राई (हिमाल), प्रदेश १ का आर्थिक मामिला तथा योजना मन्त्री इन्द्रबहादुर आङ्बो (मौसम) र हेमराज भण्डारी अध्यक्षका आकांक्षी देखिएका छन् ।
पटक–पटक माओवादी फुट्दा समेत साथ दिएका प्रदेश अध्यक्ष समेत रहेका राईले सहमतिका लागि प्रयास गरेको बताएका छन् ।
उनले अहिले नै उम्मेदवारी घोषणा नगरे पनि बहुमत प्रतिनिधिहरूले उठ्न भन्न थालेको बताएका छन् ।
उदयपुरबाट संघीय सांसद जितेका राईको जनाधार समेत राम्रो रहेकाले उनलाई अध्यक्ष बनाउने प्रचण्डको तयारी रहेको माओवादीकै नेताहरू बताउँछन् ।
पाटीभित्र संकट आउँदा प्रचण्डलाई साथ दिएका कारण उनलाई अध्यक्ष बनाउनका लागि प्रचण्ड नै लागेको उनी निकट स्रोतले जनाएको छ ।
जिल्ला कमिटी नै नरहेकाले आकांक्षी समेत धेरै देखिएको उनले बताएका छन् ।
युवाहरूमा लोकप्रिय मानिएका युवा नेता आङ्बो नेकपा माओवादी केन्द्र प्रदेश १ संसदीय दलका नेता समेत हुन् । प्रदेश १ को राजनीतिक खेलाडीका रूपमा समेत उनलाई चिन्ने गरिन्छ ।
उनलाई गठबन्धन तथा प्रमुख प्रतिपक्षी दलका सांसदहरूले चाणक्य भनेर समेत चिन्ने गरेका छन् । संसदभित्र अध्ययनशील नेताका रूपमा समेत उनलाई चिन्ने गरिएको छ ।
माओवादी फुट्दा मोहन वैद्यतिर लागेका उनी बादल निकटका मानिन्थे । बादल एमालेमा गए पनि उनी भने माओवादीमै बसेका थिए ।
केन्द्रीय सदस्य तथा पाँचथरका इञ्चार्ज रहेका आङ्बोले प्रदेशको पदाधिकारीका लागि यसअघि नै बल गरेका थिए । उनले केही समयअघि प्रचण्डलाई भेटेरै आफू अध्यक्षमा उठ्ने बताएका थिए ।
त्यतिबेला प्रचण्डले हाँसेर टारेको स्रोतको दाबी छ ।
वर्तामान सचिव समेत रहेका हेमराज भण्डारीले पनि अध्यक्षको कार्ड फालिरहेका छन् । धनकुटाका भण्डारी संविधान सभा सदस्य समेत हुन् ।
वैचारिक बहसमा खरो रूपमा उत्रिन सक्ने भण्डारीको कार्यकर्तामा पकड भने कमजोर रहेको माओवादीकै नेता बताउँछन् ।
माओवादीबाट जितेका जनप्रतिनिधिलाई समेत रोक्न नसकेको आरोप उनीमाथि छ । धनकुटामा माओवादी कमजोर बन्दा अध्यक्ष प्रचण्ड पनि उनीसँग त्यति खुसी नरहेको बताइन्छ ।
प्रदेश अधिवेशनमा माओवादीले पार्टीले अहिलेसम्म गरेका काम तथा राजनैतिक र सांगठनिक विषयवस्तु समेटिएको डकुमेन्ट्री पनि प्रस्तुत गर्ने तयारी गरेको छ ।
त्यसका लागि नेताहरू राम कार्की र सुरेश अधिकारी तयारीमा जुटेका छन् । पार्टी अध्यक्ष प्रचण्ड सर्वसम्मतरूपमा प्रदेशको नेतृत्व चुनिनुपर्ने पक्षमा छन् ।
तर, सहमतिको सम्भावना कमजोर देखिएको छ । प्रदेश १ मा १ हजार १ सय ५० प्रतिनिधि सहभागी हुने बुझिएको छ ।
मोरङको विराटचोकमा हुने प्रदेश अधिवेशनको उद्घाटन प्रचण्डले भर्चुअल माध्यमबाट गर्ने माओवादीले जनाएको छ ।
