३० जेठ २०८३, शनिबार
नेपाली कांग्रेसको १४ औँ महाधिवेसन अन्तर्गत सोमवार भएको निर्वाचनको मतगणना राति अबेरसम्म शुरू हुन सकेको छैन ।
मंगलवार बिहान २ बजेदेखि शुरू हुने भनिएको मतगणना बिहान साढे ३ बजिसक्दा पनि शुरू हुन नसकेको हो ।
मतगणनाको आन्तरिक तयारीमै रहेकाले केही ढिलाइ भएको निर्वाचन समितिले जनाएको छ ।
अबको केही बेरमै मतगणना शुरू गर्ने समितिको भनाइ छ ।
मतगणना स्थलमा सुरक्षा व्यवस्थामा कडाई गरिएको छ भने सिसिटिभी पनि जडान गरिएको छ ।
मतपेटिकालाई सुरक्षाकर्मीहरूले सुरक्षा दिइरहेका छन् ।
महाधिवेशन स्थल भृकुटीमण्डप र राष्ट्रिय सभागृहमा सोमवार बिहान साढे ११ बजेबाट शुरू भएको मतदान १२ घण्टापछि राति साढे ११ बजे सम्पन्न भएको हो ।
बिहान ८ बजेबाट शुरू हुने भनिएको मतदान ३ घण्टा ढिला गरी शुरू भएको थियो । मतपत्र अभावमा बीचमा पनि मतदान प्रभावित भएको थियो ।
कांग्रेस महाधिवेशनमा ४ हजार ७ सय ४३ प्रतिनिधि चुनिएर आएकोमा ४ हजार ६ सय ७९ जनाले मतदान गरेको निर्वाचन समितिले जनाएको छ । ६४ जना भने अनुपस्थित रहे ।
भावी नेतृत्वका लागि सभापतिमा वर्तमान सभापति एवं प्रधानमन्त्री शेरबहादुर देउवा तथा नेताहरू डा। शेखर कोइराला, विमलेन्द्र निधि, प्रकाशमान सिंह र कल्याण गुरुङ प्रतिस्पर्धामा छन् ।
