नेपाली कांग्रेसको महामन्त्रीका प्रत्यासी गगन थापाले आफ्नो हृदयलाई सोधेर मात्र मतदान गर्न अपिल गरेका छन् ।

कांग्रेस सभापति चयनका लागि दोस्रो चरणको मतदान हुनुअघि एक अपिल जारी गर्दै गगनले सभापतिका प्रत्यासी डा. शेखर कोइरालालाई मतदान गर्न अपिल गरेका हुन् ।

'आज निर्णय गर्ने बेला आएको छ । तपाईंको एक भोट आज यो मतदानको लाइनमा आउन नसकेका ती तमाम नेपालीको सपना र आशासँग पनि जोडिएको छ । तपाईंको विवेकपूर्ण एक मत हाम्रो पार्टी र मुलुकको भविष्य बदल्ने प्रस्थान बिन्दु हुनेछ,' गगनले लेखेका छन्, 'एकपटक आफ्नो हृदयलाई सोधेर, हाम्रा अग्रजहरूको बलिदान र भावी सन्ततिका सपनाको स्मरण गर्दै विवेकपूर्ण निर्णय गर्न र पार्टी रुपान्तरणका लागि डा. शेखर कोइरालालाई आफ्नो अमूल्य मत दिएर सभापति पदमा विजयी गराउन पुन: हार्दिक अपिल गर्दछु ।'

उनले संविधान कार्यान्वयनको सफल नेतृत्व गर्न, राजनीतिमा देखिएका अनेकन बेथितिको अन्त्य गर्न र पार्टीलाई विधि र थितिमा बसाल्न नेतृत्व परिवर्तन अपरिहार्य रहेको उल्लेख गरेका छन् ।

हेर्नुहोस्, अपिल :

आदरणीय महाधिवेशन प्रतिनिधि साथीहरू,आज इतिहासले हामीसँग असाधारण निर्णय लिन आह्वान गरिरहेको छ। इतिहासको त्यो आह्वान र अन्तरमनको आवाज सुनेर पार्टी रुपान्तरणको पक्षमा उभिन र डा.शेखर कोइरालालाई आफ्नो अमूल्य मत दिएर सभापति पदमा विजयी गराउन पुन: हार्दिक अपील गर्दछु। जय नेपाल! pic.twitter.com/V8VXEWDmMC

— Gagan Thapa (@thapagk) December 14, 2021