चर्काे शुल्क लिने नोबेल मेडिकल कलेजका सञ्चालक र सीडीओबीच चर्काचर्की, प्रशासन आक्रामक

नोबेल मेडिकल कलेज शिक्षण अस्पतालले अतिरिक्त शुल्क लिएको विषयमा मोरङका प्रमुख जिल्ला अधिकारी (सीडीओ) काशिराज दाहाल आक्रमक रूपमा प्रस्तुत भएका छन् । 

विद्यार्थीसँग अतिरिक्त शुल्क लिएको खुल्ने कागजातसहित जिल्ला प्रशासन कार्यालयमा आउन उनले सोमवार निर्देशन सहितको पत्र पठाएका थिए ।

मंगलवार बिहान साढे १० बजे जिल्ला प्रशासन कार्यालयमा अभिभावक, नोबेल मेडिकल शिक्षण अस्पतालका प्रतिनिधि तथा जिल्ला प्रशासन कार्यालय मोरङ बीचको छलफलमा सीडीओ दाहाल आक्रामक रूपमा प्रस्तुत भएका छन् ।

अतिरिक्त शुल्क लिनुका कारण खुल्ने कागज ल्याउन भने पनि नोबेलका प्रतिनिधिले कागजात नलगेपछि उनी आक्रामक बनेका छन् । चिकित्सा शिक्षा आयोगले तोकेकोभन्दा बढी शुल्क किन लिएको भनेर सोध्दा नोबेलका प्रतिनिधिले ‘हामी कर्मचारी मात्रै हौं’ भन्दै कुनै जवाफ नदिएको छलफलमा सहभागी एक अभिभावकले बताए । 

कर्मचारीले जवाफ नदिएपछि सीडीओ दाहालले मेडिकल कलेजका सञ्चालक डा. सुनिल शर्मालाई फोन गरेका थिए । टेलिफोन संवादमा शर्माले अतिरिक्त शुल्क नलिए पढाउन नसक्ने जवाफ दिएको ती अभिभावकले बताए । नाम नखुलाउने शर्तमा ती अभिभावकका अनुसार शर्माले सीडीओ दाहाललाई ‘तपाईं आएर मेरो कलेज चलाइदिनुहोस्’ भनेर समेत भनेका थिए ।

संवादमा सीडीओले पठनपाठन तुरुन्त शुरू गर्न निर्देशन दिएका थिए तर शर्माले सीडीओलाई पढाउने नसक्ने बरु पक्राउ पुर्जी जारी गर्न चुनौती दिए ।

सीडीओ दाहालले चिकित्सा शिक्षा आयोगका उपाध्यक्ष श्रीकृष्ण गिरीलाई समेत फोन गरेर प्रतिनिधिलाई शिक्षा आयोगले तोकेको मूल्यबारे जानकारी गराएका थिए । छलफलमा नोबेल मेडिकल कलेजले लिने भनिएको इन्टर्नशिप बापतको शुल्क २ लाख ४० हजार नलिने सहमति भने भएको सीडीओ दाहालले बताए ।

होस्टल बसाइलाई अनिवार्य नगर्ने, होस्टल शुल्क परिमार्जन गरी घटाउने विषयमा भने सहमति भएको छैन । शर्माले सीडीओ दाहाललाई करोडौं लगाएर होस्टेल बनाएको भन्दै होस्टल नचल्दा घाटा हुने समेत बताएका थिए । 

विश्वविद्यालय सम्बन्धन शुल्क ९८ हजार रूपैयाँबारे चिकित्सा शिक्षा आयोगबाट निर्देशन भए तिर्न अभिभावक सहमत भएका छन् । 

चालू शैक्षिक सत्रको कक्षा पुस ११ गतेदेखि सञ्चालन गर्ने निर्णय भए पनि मेडिकल कलेजका प्रतिनिधि निर्णयमा हस्ताक्षर नगरी बाहिरिएका छन् । आफूहरू कर्मचारी मात्रै भएको भन्दै उनीहरू त्रिपक्षीय छलफलको निर्णयमा हस्ताक्षर नगरी निस्केका हुन् ।

छलफलमा मेडिकल कलेजको तर्फबाट अर्जुन थापा, दिपेश राई, नारायणप्रसाद दाहालको उपस्थिति थियो ।  

नोबेल मेडिकल कलेज शिक्षण अस्पताल विराटनगरले अतिरिक्त शुल्क बुझाए मात्रै पढाइ शुरू गर्ने बताएपछि विद्यार्थी र अभिभावक आन्दोलित बनेका छन् । 

चिकित्सा शिक्षा आयोगले शैक्षिक सत्र २०७७/२०७८ का लागि निर्धारण गरेको शुल्कभन्दा झण्डै ५ लाख रुपैयाँ बढी मागेपछि अभिभावक समेत आन्दोलित बनेका छन् । कलेजले आयोगले तोकेकोभन्दा ४ लाख ८२ हजार रुपैयाँ बढी बुझाउन दबाब दिँदै आएको अभिभावकको भनाइ छ । 

कलेजले स्नातक तह (एमबीबीएस) मा भर्ना हुने विद्यार्थीबाट इन्टर्नशिपबापत २ लाख ४० हजार, विश्वविद्यालय सम्बन्धन शुल्कबापत ९८ हजार, होस्टेल शुल्क १ लाख ४४ हजार रुपैयाँ बुझाउन दबाब दिँदै आएको छ । 

चिकित्सा शिक्षा आयोगले एमबीबीएस अध्ययनका लागि जम्मा कूल रकम ४४ लाख ३६ हजार २५ रुपैयाँ निर्धारण गरेको छ । त्यसमध्ये प्रथम वर्ष १४ लाख ७८ हजार ६७५ रुपैयाँ अभिभावकले बुझाएका छन् ।

चिकित्सा शिक्षा आयोगले पुस ५ गते एक सूचना जारी गर्दै होस्टल विद्यार्थीको ऐच्छिक विषय हुने जनाइसकेको छ ।