२६ जेठ २०८३, मंगलबार
इरानको इस्लामिक रिभोल्युसनरी गार्ड कोर्प्सले सैन्य अभ्यासका क्रममा इजरायलको आणविक भट्टीमा नक्कली आक्रमण गरेको छ ।
नक्कली भट्टी नै खडा गरेर त्यसलाई कैयौं ब्यालिस्टिक क्षेप्यास्त्र र ड्रोनमार्फत आक्रमण गरिएको थियो ।
ग्रेट प्रोफेट १७ सैन्य अभ्यास अन्तर्गत यो नक्कली आक्रमण गरिएको हो । यो पाँचदिने अभ्यास डिसेम्बर २० बाट शुरू भएको हो ।
इजरायलको डिमोना रियाक्टरको नक्कली प्रारूप बनाएर त्यसलाई ध्वस्त पारेको भिडियो फूटेज इरानको सञ्चारमाध्यममा प्रसारण गरिएको छ ।
अभ्यासको भिडियोमा अनेकौं ब्यालिस्टिक क्षेप्यास्त्र लोन्चर आक्रमणका लागि तम्तयार पारेर राखिएको र तिनले तारोमा प्रहार गरेको देखिन्छ ।
इरान र इजरायलबीच तनाव उच्च विन्दुमा पुगेको बेलामा ग्रेट प्रोफेट १७ अभ्यास गरिएको हो । इजरायलले इरानसँगको आणविक सम्झौता ब्युँताउन नहुने बताउने गरेको छ । यसमार्फत इरानले आणविक हतियार बनाउने अनि इजरायलमाथि प्रहार गर्ने इजरायलको आशंका छ ।
इरानले यस आरोपलाई खण्डन गर्ने गरेको छ ।
