२४ जेठ २०८३, आइतबार
इजरायलका परराष्ट्रमन्त्री याइर लापिडले अमेरिकाका राष्ट्रपति जो बाइडनलाई खबर नगरिकनै इरानको आणविक विकासलाई रोक्न आफ्नो देशले बलप्रयोग गर्न सक्ने स्पष्ट पारेका छन् ।
‘आफ्नो सुरक्षालाई संरक्षण गर्न इजरायलले आवश्यक सबै कदम चाल्छ । त्यसका लागि हामीलाई कसैको अनुमति आवश्यक छैन । हामीले यो राज्य स्थापना गरेकै दिनदेखि यो कुरा लागू हुन्छ,’ लापिडले इजरायलको च्यानल १२ सँग कुरा गर्दै भने ।
इजरायलसँग सफल आक्रमण गर्ने क्षमता छ त भनी सोधिएको प्रश्नमा लापिडले भने, ‘इजरायलसँग भएको क्षमता संसार अनि यस क्षेत्रका केही विज्ञसमेतको पनि कल्पनाबाहिरको कुरा हो । र इजरायलले आफूलाई इरानी जोखिमबाट सुरक्षित गर्न सक्छ ।’
सन् २०१५ को आणविक सम्झौतालाई ब्युँताउने वार्ता भइरहेको बेलामा इजरायलका अधिकारी र सैन्य अधिकृतहरूले इरानमाथि आक्रमण गर्ने विषयमा सोच बनाइरहेका छन् ।
इजरायलले दिइरहेको चेतावनीका विषयमा तेहरानले शंका व्यक्त गरेको छ । ती कोरा चेतावनी भएको तर आक्रमण गरिएमा कठोर जवाफ फर्काइने उसले प्रतिज्ञा गरेको छ ।
