२५ जेठ २०८३, सोमबार
डोटी जिल्लाका २५ हजार स्कूले बालबालिकालाई विद्यालयमै कोरोना विरुद्धको खोप लगाउन शुरू गरिएको छ ।
जिल्लाका ९ वटै स्थानीय तहका ११ वर्ष माथिदेखि १८ वर्षमुनिका विद्यार्थीलाई खोप लगाउन शुरू गरिएको जिल्ला स्वास्थ्य कार्यालयले जनाएको छ ।
जिल्लाका ९ वटै स्थानीय तहमा रहेका विद्यालयमा अध्ययनरत ३३ हजार बालबालिकामध्ये पहिलो चरणमा २५ हजार बालबालिकालाई खोप लगाउन शुरू गरिएको कार्यालयको भनाइ छ ।
जिल्लामा ३३ हजार विद्यार्थीको तथ्यांक प्राप्त भए पनि २५ हजार डोज मात्रै खोप उपलब्ध भएका कारण पहिलो चरणमा पुग्ने जतिलाई खोप लगाउन थालिएको र बाँकीलाई दोस्रो चरणमा लगाइने कार्यालयका स्रोत व्यक्ति डिल्लीरमण जोशीले जानकारी दिए ।
उनका अनुसार हालसम्म कम्तीमा पनि १० हजार जनालाई खोप लगाइएको छ । यो खोप फ्रिजबाट निकालेको १ महिनाभित्र लगाइसक्नुपर्ने भएकाले चाँडै लगाउन थालिएको स्रोत व्यक्ति जोशीले बताए ।
डोटीका ९५ प्रतिशत खोप केन्द्र विद्यालयमै दिइने र केही खोप केन्द्र अस्पताल तथा स्वास्थ्य चौकीबाट उपलब्ध गराइने भएको छ ।
विद्यार्थी पनि खुशीका साथ कोरोना विरुद्धको खोप लगाउन थालेका कार्यालयका सूचना अधिकारी अमरसिंह भाटले जानकारी दिए । उनले भने, ‘हामीले विद्यालयमै कोरोना विरुद्धको खोप लगाउन शुरू गरेका छौं, विद्यार्थी पनि खुशीका साथ खोप लगाउन थालेका छन् ।’
