१७ असार २०८३, बुधबार
फोटो सहितको मतदाता नामावली संकलन गर्ने क्रममा दाङमा २५ हजार ५०० मतदाता थपिएका छन् ।
पहिलो चरणअन्तर्गत बंगलाचुली, बबई, शान्तिनगर र दंगिशरणमा गत मंसिर १७ देखि पुस २ गतेसम्म गाउँपालिकाको कार्यालयबाटै नामावली संकलन गरिएको निर्वाचन कार्यालय प्रमुख निमराज भट्टराईले जानकारी दिए ।
पालिकाका प्रत्येक वडामा फरक–फरक समयमा पालैपालो मतदाता नामावली संकलन गरिएको थियो । दोस्रो चरणको मतदाता नामावली संकलन पुस ४ देखि पुस १८ गतेसम्म राप्ती, राजपुर र गढवा गाउँपालिकामा गरिएको उनले बताए ।
घोराहीको प्रदेश निर्वाचन कार्यालय, जिल्ला प्रशासन कार्यालय, लमही र तुलसीपुरको इलाका प्रशासन कार्यालयबाट फोटो सहितकोे मतदाता नामावली संकलन भइरहेको छ ।
बसाइँसराइँ र विवाह दर्ताको प्रमाणपत्रका आधारमा पनि मतदाता नामावली संकलन हुने भट्टराईले जानकारी दिए । उनका अनुसार दैनिक ५०० देखि ९०० सम्मको नाम दर्ता हुँदै आएको छ । विशेष अभियान शुरू हुनुुपूूर्व दाङमा ३ लाख ७७ हजार ५ मतदाताले आफ्नो नाम दर्ता गराएका थिए ।
पछिल्लो समय थप भएका २५ हजार ५०० सहित ४ लाख ३ हजार मतदाता संख्या पुुगेको छ । नामावली दर्ता गर्न छुटेका, १६ वर्ष उमेर पूरा भई नागरिकता प्राप्त गरेका सबैलाई नामावली दर्ता गर्न प्रमुख भट्टराईले आग्रह गरेका छन् ।
