१२ असार २०८३, शुक्रबार
इराकमा रहेको अमेरिकी सैन्य अड्डामा आक्रमणका लागि उपयोग गरिएको विस्फोटक सामग्रीयुक्त दुईवटा ड्रोनहरूलाई ध्वस्त पारिएको भिडियो सार्वजनिक भएको छ ।
मंगलवार भएको उक्त घटनामा अमेरिकाका सी–राम एयर डिफेन्स बलहरूले ड्रोनलाई खसाएका हुन् । इराकको राजधानी बग्दादको पश्चिममा रहेको ऐन अल–असद एयरबेसमा घटना भएको हो ।
यस्तै किसिमका ड्रोनहरू सोमवार पनि देखिएका थिए । तिनको पखेटामा सोलेमानीको बदला लेखिएको थियो । तिनलाई बीचैमा रोकिएको थियो ।
दुई वर्षअघि इरानका शीर्ष सैन्य अधिकृत कासेम सोलेमानीलाई बग्दाद विमानस्थल नजिक अमेरिकाले ड्रोन आक्रमण गरी हत्या गरेको थियो । इरानले त्यसको प्रतिशोध लिन खोजिरहेको छ ।
इरानी ड्रोनहरूलाई ध्वस्त पार्ने सी–राम मशिनगन हो जसले एक मिनेटमा ४५ सय राउन्ड गोली प्रहार गर्न सक्छ । यसलाई चारैतिर घुम्ने बेसमा राखिएको हुन्छ र रेडारमार्फत निर्देशित तथा नियन्त्रित गरिएको हुन्छ ।
रेडार सिस्टमले कुनै पनि लक्ष्यलाई पत्ता लगाउने, त्यसको लेखाजोखा गर्ने, ट्य्राक गर्ने र त्यसमाथि आक्रमण गर्ने काम गर्छ । आक्रमणपछिको क्षतिलाई मूल्यांकन गर्ने क्षमता पनि यससँग छ ।
