०२ साउन २०८३, शनिबार
काठमाडौं जिल्ला टेबलटेनिस संघको आयोजनामा हुने ११औं पूर्णमान बज्राचार्य स्मृति राष्ट्रिय खुला टेबलटेनिस प्रतियोगितालाई केबी साम अल्मुनियम इन्डस्ट्रिज प्रालिले मुख्य प्रायोजन गर्ने भएको छ ।
मुख्य प्रायोजनबापत प्रालिले आयोजक संघलाई २ लाख रुपैयाँ प्रदान गरेको छ ।
प्रालिका अध्यक्ष कमलकुमार बेगानी र प्रमुख कार्यकारी अधिकृत अमित बेगानीले आयोजक संघका अध्यक्ष धम्रमान बज्राचार्यलाई २ लाख बराबरको चेक शुक्रवार एक कार्यक्रमबीच हस्तान्तरण गरे ।
चेक हस्तान्तरणपछि प्रमुख कार्यकारी अधिकृत बेगानीले सामाजिक उत्तर दायित्यअन्तर्गत प्रतियोगितालाई सहयोग गरेको बताउँदै खेलकुदसँग जोडिन पाउँदा खुशी लागेको बताए ।
प्रमुख कार्यकारी अधिकृत बेगानीले सहयोग थोरै भए पनि प्रतियोगिता आयोजना गर्न केही सहज हुने बताए ।
अध्यक्ष बज्राचार्यले मुख्य प्रायोजनका लागि प्रालिलाई धन्यवाद दिँदै यस्तै सहयोगले खेलकुद गतिविधिलाई अगाडि बढाउन टेवा पुग्ने धारणा व्यक्त गरे ।
‘सबैका लागि टेबलटेनिस’ भन्ने नारा साथ हुन लागेको प्रतियोगिता माघ १ गतेदेखि लैनचौरस्थित राष्ट्रिय टेबलटेनिस प्रशिक्षण केन्द्रमा शुरू हुँदैछ । खुला पुरुष/महिला सिंगल्ससहित पुरुष/महिला भेट्रान, पारा, स्कुल, कलेज र खेलकुद पत्रकार स्पर्धा गरी जम्मा ३४ स्पर्धामा प्रतिस्पर्धा हुनेछ ।
खुला पुरुष/महिला सिंगल्समा पहिलो हुनेले ५० हजार, दोस्रोले २५ हजार र तेस्रो हुने २ जनाले १०/१० हजार नगद पुरस्कार प्राप्त गर्नेछन् ।
अखिल नेपाल टेबलटेनिस संघको वार्षिक क्यालेन्डर अनुसार हुन लागेको प्रतियोगितामा करीब ७०० खेलाडी सहभागी हुने आयोजकले जनाएको छ ।
