१७ असार २०८३, बुधबार
मोरङको लेटाङमा पाहुना आएका वृद्धको हत्या आरोपमा अर्का एक जना वृद्ध पक्राउ परेका छन् ।
जिल्ला प्रहरी कार्यालय मोरङका अनुसार लेटाङ नगरपालिका–२, फँडानीमा ६० वर्षीय प्रेमबहादुर बुढाथोकीको हत्याको आरोपमा प्रहरीले ८१ वर्षीय डम्बरबहादुर भुजेललाई पक्राउ गरेको हो ।
सोमवार साँझ भुजेलको आँगनमा बुढाथोकीको शव भेटिएको थियो । बुढाथोकी भुजेलकोमा पाहुना बनेर आएको प्रहरीले जनाएको छ ।
प्रहरीका अनुसार मृतकको टाउकोमा धारिलो हतियारले प्रहार गरेको देखिन्छ ।
भुजेलले शव घिसारेर घर नजिकैको बाँसघारीतिर लैजाँदै गर्दा स्थानीयले देखेपछि प्रहरीलाई खबर गरेका थिए । बुढाथोकीको घर लेटाङमै हो ।
सोमवार बेलुका भुजेल र बुढाथोकी घरमै मदिरा सेवन गरेका थिए । मदिरा सेवनपछि विवादका कारण हत्या गरेको हुन सक्ने प्रहरीले जनाएको छ ।
भुजेललाई पक्राउ गरी अनुसन्धान थालिएको प्रहरीको भनाइ छ ।
