टर्मिनल मुटु रोग भएका एक अमेरिकी नागरिक सुँगुरको मुटु प्रत्यारोपणपछि निको भएका छन् ।

यस प्रकारको यो पहिलो शल्यक्रियामा आनुवंशिक रुपमा परिमार्जित सुँगुरको मुटु प्रत्यारोपण गरिएको थियो । तीन दिनपछि बिरामीको अवस्था ठीक रहेको चिकित्सकहरूले बताएका छन् ।

युनिभर्सिटी अफ मेरिल्याण्ड मेडिसिनको टोलीले गरेको यो शल्यक्रिया सुँगुरबाट मानव मुटु प्रत्यारोपणको सम्भाव्यता देखाउने पहिलो शल्यक्रिया हो, जुन नयाँ जीन सम्पादन उपकरणहरूद्वारा सम्भव भएको हो ।

वैज्ञानिकहरूका अनुसार यसको सफलताले अंगदाताहरूको अभावलाई कम गर्न मद्दत गर्न सक्छ ।

शल्यक्रियामा संलग्न डा. बार्टले ग्रिफितले भने, ‘यो एक सफल शल्यक्रिया थियो र यसले हामीलाई अंगको अभावको संकट समाधान गर्न एक कदम नजिक ल्यायो । सम्भावित प्राप्तकर्ताहरूको लामो सूची पूरा गर्न पर्याप्त दाता मानव हृदयहरू उपलब्ध छैनन् । मेरिल्याण्डका ५७ वर्षीय डेभिड बेनेटका लागि प्रत्यारोपण अन्तिम विकल्प थियो ।’

विश्वविद्यालयले जारी गरेको विज्ञप्तिअनुसार बेनेटले आफ्नो शल्यक्रिया गर्नुभन्दा एक दिन अगाडि, ‘कि त मर्ने हो कि प्रत्यारोपण । म बाँच्न चाहन्छु । मलाई थाहा छ यो अँध्यारोमा प्रहार हो, तर यो मेरो अन्तिम रोजाइ हो ।’

प्रायोगिक शल्यक्रियाको साथ अगाडि बढ्नको लागि विश्वविद्यालयले नयाँ वर्षको पूर्वसन्ध्यामा यूएस फूड एण्ड ड्रग एडमिनिस्ट्रेशनबाट आपतकालीन आधिकारिकता प्राप्त गरेको थियो । 

‘एफडीएले हाम्रो डाटा र प्रयोगात्मक सुँगुरको डाटा प्रयोग गरी अन्तिम चरणको हृदय रोग बिरामीमा प्रत्यारोपणको लागि अनुमति दियो, जसको उपचारको विकल्प छैन,’ युनिभर्सिटीको जेनोट्रान्सप्लान्टेसन कार्यक्रमका प्रमुख डा.मुहम्मद मोहिउद्दीनले भने ।

अर्गानडोनर संस्थाका अनुसार लगभग एक लाख १० हजार अमेरिकीहरू हाल अंग प्रत्यारोपणको लागि पर्खिरहेका छन् र प्रत्येक वर्ष ६ हजारभन्दा बढी बिरामीहरू अंग प्राप्त गर्नुअघि नै मर्छन् ।

बेनेटको आनुवांशिकरूपले परिमार्जित सुँगुरको मुटु ब्ल्याक्सबर्ग, भर्जिनियामा रहेको एक पुनरुत्पादक औषधि कम्पनी रेभिभिकोरले प्रदान गरेको थियो । शल्यक्रियाका दिन प्रत्यारोपण टोलीले सुँगुरको मुटु निकालेर शल्यक्रिया नभएसम्म विशेष उपकरणमा सुरक्षित साथ राखेको थियो । 

सुँगुरहरू लामो समयदेखि प्रत्यारोपणको एउटा सम्भावित स्रोत बनेका छन् किनभने तिनीहरूका अंगहरू मानिससँग मिल्दोजुल्दो छन् । मानिसमा प्रत्यारोपणका लागि सुँगुरका मृगौला, कलेजो र फोक्सो जस्ता अन्य अंगहरू पनि अनुसन्धान भइरहेका छन् ।

सुँगुरबाट मानव प्रत्यारोपणमा अघिल्ला प्रयासहरू संक्रमणको जोखिम निम्त्याउने भाइरसहरूका कारण असफल भएका थिए । 

वैज्ञानिकहरूले सम्भावित हानिकारक जीनहरू सम्पादन गरेर त्यो समस्या समाधान गरेका छन् । - रोयटर्सबाट