१८ असार २०८३, बिहीबार
संस्कृति, पर्यटन तथा नागरिक उड्डयन मन्त्री प्रेमबहादुर आलेले कोरोना महामारीको समयमा भएको चार्टर्ड उडानको अनियमितताका सम्बन्धमा छानबिन समिति गठन गरेका छन् ।
पर्यटनमन्त्री स्तरीय निर्णयबाट मन्त्रालयले छानबिन समिति गठन गरेको हो ।
समितिको संयोजकमा पर्यटन मन्त्रालयकै सहसचिव होमप्रसाद लुँइटेल छन् । सदस्यमा पर्यटन मन्त्रालयकै उपसचिव टेकनारायण पौडेल र नेपाल नागरिक उड्डयन प्राधिकरणका निमित्त महानिर्देशक प्रेमनाथ ठाकुर छन् ।
समितिलाई १० दिनभित्र प्रतिवेदन बुझाउने गरी समयसीमा दिएको पर्यटनमन्त्री प्रेम आलेले लोकान्तरलाई बताए । मन्त्री आलेका अनुसार यो निर्णायक समिति हो, यसले दोषीमाथि कारबाही गर्नेछ ।
कोरोनाको पहिलो र दोस्रो संक्रमण लहरमा विदेशमा फसेका नेपालीलाई स्वदेश ल्याउनका लागि सरकारले उद्धार उडान गर्न नेपाल वायुसेवा र हिमालयन एयरलाइन्सलाई अनुमति दिएको थियो ।
महामारीमा भएको यस्तो उडानमा निगमले ६५ अनुमति पाउँदा हिमालय एयरलाइन्सलाई झण्डै ४ गुणा बढी अर्थात् २३९ चार्टर्ड फ्लाइट गर्न दिइएको थियो ।
निगमलाई घाटा पार्ने र निजी क्षेत्रका वायुसेवालाई पोस्ने गरी दिइएको यस्तो उडानको विषयमा छानबिन गरेर सत्यतथ्य बुझ्ने र दोषी भेटिए कारवाही पनि गर्ने गरी छानबिन समिति गठन भएको मन्त्री आलेले बताए ।
उनका अनुसार यसअघि बनेको यही प्रकृतिको छानबिन प्रतिवेदनलाई आधार बनाउने र छानबिनबाट जे आउँछ त्यसलाई कार्यान्वयन गर्ने गरी समिति बनेको हो । ‘१० दिनभित्रै आउने प्रतिवेदन थन्काउन होइन, कार्यान्वयन गर्नलाई बनाइएको हो,’ मन्त्री आलेले भने ।
यसअघि असार ७ गते उड्डयन प्राधिकरणका तत्कालीन महानिर्देशक राजन पोखरेलको संयोजकत्वमा उद्धार उडानमा भएको अनियमितिताको विषयमा छानबिन समिति गठन भएको थियो । समितिले भदौ १६ गते पर्यटन सचिवलाई बुझाएको प्रतिवेदनमा निजी वायुसेवाले तोकेभन्दा बढी भाडा लिएको निष्कर्ष सहितको प्रतिवेदन तयार भएको थियो । प्रतिवेदन सरकारले कार्यान्वयन गरेन ।
उनले अघिल्लो सरकारले महामारीका सामान ओम्नीमार्फत ल्याउँदा निगमले १ करोड ९४ लाख रुपैयाँ नपाएको पनि बताए । यो विषयमा पनि आफूले थप बुझ्ने प्रयास गरिरहेको र निगमले पाउनुपर्ने रकम दिलाउन प्रयास भइरहेको आलेले बताए ।
