०५ साउन २०८३, मंगलबार
संयुक्त अरब अमिरात (यूएई) को राजधानी अबु धाबीमा सोमवार प्रहार गरिएका दुई ब्यालिस्टिक क्षेप्यास्त्रलाई बीचैमा रोकिएको त्यहाँको सरकारले दाबी गरेको छ ।
यमनमा सक्रिय हूती विद्रोही लडाकूहरूका एक प्रवक्ताले यूएई र साउदी अरबलाई तारो बनाएर आक्रमण गरेको बताए । उनले यसको विस्तृत विवरण दिएनन् ।
गत साता पनि अबु धाबीमा आक्रमण गरिएको थियो । त्यस आक्रमणमा परी तीनजनाको मृत्यु भएको थियो र ६ जना घाइते भएका थिए । यमनमा वर्षौंदेखि चलिरहेको गृहयुद्ध लम्बिँदै जाँदा पर्सियाली खाडीमा तनाव बढेको छ ।
इरानले समर्थन गरेको हूती विद्रोहीहरूका विरुद्ध साउदी अरबको नेतृत्वमा रहेको गठबन्धनले युद्ध गरिरहेको छ । यूएई पनि गठबन्धनको सदस्य छ । त्यसको बाछिटा अब खाडीमा पनि पर्न थालेको छ ।
यूएईको सरकारी समाचार संस्था डब्ल्यूएएमले क्षेप्यास्त्रका टुक्राहरू अबु धाबीमा खसेको र कसैलाई क्षति नगरेको खबर दियो ।
क्षेप्यास्त्र विस्फोट भएपछि अबु धाबी अन्तर्राष्ट्रिय विमानस्थलको ट्राफिकमा एक घन्टा बाधा पुगेको थियो ।
