कीर्ते कागजात मुद्दामा अदालतबाट दोषी ठहर भई फरार रहेकी नेकपा एमालेकी सांसद गुलेफुन खातुनलाई आसन्न राष्ट्रियसभा चुनावमा मतदान गराउने तयारी भएको छ ।

माघ १२ गते विराटनगरस्थित प्रदेश निर्वाचन कार्यालयमा राष्ट्रियसभा चुनाव हुँदैछ । एमाले निकट स्रोतका अनुसार खातुनलाई मतदानस्थलसम्म सुरक्षित रूपमा ल्याउने जिम्मा पूर्व मुख्यमन्त्री शेरधन राई, संसदीय दलका नेता तथा निवर्तमान मुख्यमन्त्री भीम आचार्य, प्रदेश सासद तथा प्रदेश कमिटी अध्यक्ष तुलसीप्रसाद न्यौपाने र प्रदेश इन्चार्ज देवराज घिमिरेलाई दिइएको छ ।

प्रदेश कमिटी अध्यक्ष तुलसी न्यौपानेले खातुन मतदाता भएकाले मतदानमा सहभागी हुने अधिकार भएकाले मतदानमा आउनसक्ने बताए ।

मोरङको तत्कालीन कदमाहा गाविस–२ मा ससुरा स्व. शेख धाइका मियाँको नाममा रहेको मोहियानी हक हस्तान्तरणका लागि मधुसूदनराज पाण्डेको कित्ता नम्बर १०६, २५५ र सीता जोशी पाण्डेको कित्ता नम्बर ११० भएको ३ बिघा १० कट्ठा जग्गा नामसारी गर्न उनले सरकारी छाप र दस्तखत कीर्ते गरेर गाविसको सिफारिस कागज बनाएको मुद्दामा अदालतले दोषी ठहर गरेको छ ।

जिल्ला अदालतले २०७४ वैशाख ३१ गते खातुन र उनका पतिलाई १ वर्ष कैद र ५० रुपैयाँ जरिवानाको फैसला सुनाएको थियो । त्यसपछि खातुनले २०७४ भदौ १९ गते उच्च अदालत विराटनगरमा जाहेरी दिएकी थिइन् ।

उच्चले खातुनसहित ३ जनाको हकमा कैदतर्फ जिल्लाकै फैसलालाई सदर गर्दै जनही १४ हजार ५८३ रुपैयाँ जरिवानाको फैसला सुनाएको थियो । 

यता, मोरङ प्रहरीले खातुन आउने सूचना पाएपछि प्रहरी परिचालन गरेको छ । खातुनका लागि व्यापक प्रहरी परिचालन गरिएको जिल्ला प्रहरी कार्यालय मोरङका प्रमुख एसपी जनार्दन जिसीले बताए । 

दोषी ठहर भएपछि खातुन प्रदेश सभामा आएकी थिइन् । संसदमा आउँदा समेत प्रहरीले उनलाई नियन्त्रणमा लिन सकेको थिएन ।

गृहमन्त्री बालकृष्ण खाँणले फरार सूचीमा रहेकी खानुत आउने भएकाले विशेष ध्यान दिन मोरङ प्रहरीलाई टेलिफोनमार्फत निर्देशन दिएका छन् ।