नेकपा माओवादी केन्द्रका नेता वर्षमान पुनले आफूलाई उपचारका लागि चीन लगेकोपछि मात्रै थाहा भएको बताएका छन् । ‘असोजको दोस्रो हप्तातिर मेरो स्वास्थ्यमा बंशाणुगत जन्डिससम्बन्धी पुरानै समस्या आएपछि बैंकक गएको थिएँ । सामान्य जस्तो लागेको थियो तर समस्या जटिल हुँदै गयो । करिब दुई महिना बैंकक बस्दा खासै प्रगति भएन’, चीनमा उपचार गराएर स्वदेश फर्किएपछि  सोमबार विमानस्थलमा प्रतिक्रिया दिँदै उनले भने, ‘त्यसपछि पार्टी अध्यक्ष, पार्टीले उपचारका लागि त्यहाँबाट चीन लैजाने निर्णय गर्नुभएछ । त्यतिखेर मलाई धेरै कुराहरु जानकारी हुने अवस्था पनि थिएन । एक हप्ता उपचार भएपछि बल्ल म चीनमा रहेछु भनेर थाहा पाउने अवस्था भयो । त्यति धेरै स्वास्थ्यमा गम्भीर अवस्था थियो ।’

अहिले स्वास्थ्यमा सुधार भएर आफू नेपाल फर्किएको उनले बताए । उनले यो बीचमा आफूले पार्टीको महत्वपूर्ण कार्यक्रम आठौं राष्ट्रिय महाधिवेशन छुटाउनु पर्दा दुःख लागेको पनि पुनले बताए । उनले आफू महासचिवको दाबेदार भएको पनि बताए। यसअघि नै सचिव भइसकेकाले महासचिवमा दाबेदारी स्वाभाविक भएको उनको भनाइ छ । यद्यपी सहमतिमा पदाधिकारी चयन हुनेमा उनले विश्वास व्यक्त गरे ।