धनकुटा, १६ असार– आफ्नो सहोदर दाई र आफ्नै श्रीमान् फरक पार्टीबाट एकै पदमा चुनाव लडेपछि मतदाता महिलालाई कस्तो तनाव होला ? पक्कै पनि तनाव त हुन्छ नै ।
धनकुटाको छथर जोरपाटी गाउँपालिकाको वडा नम्बर २ को अध्यक्षमा उठेका एमाले उम्मेदवार इन्द्रबहादुर सारुमगर र माओवादी उम्मेदवार कृष्णकुमार मगरको यस्तै अवस्था रह्यो । नाताले दुवै जना ज्वाइँ–जेठान हुन् । र अन्त्यमा ज्वाई कृष्णकुमार मगरले चुनाव जिते त्यो पनि एक मतले मात्रै ।
यदि उनकी श्रीमतीले आफ्ना दाईलाई भोट हालेकी भए कृष्णकुमार हार्ने थिए । तर उनी श्रीमतीको एक भोटले विजयी भएका छन् ।
विजयी कृष्णकुमार मगरले ४९९ मत र पराजित भएका इन्द्रबहादुर सारु मगरले ४९८ मत पाएका छन् ।
