साउथ सुपरस्टार अल्लु अर्जुनको फिल्म ‘पुष्पा’का संवाददेखि लिएर गीतहरू अहिले पनि ट्रेन्डिङमा छन् । मानिसहरू धेरैले नक्कल गरिरहेका पनि छन् । 

चलचित्र 'पुष्पा' गत वर्षको डिसेम्बरमा रिलिज भएको थियो । यो चलचित्रलाई दर्शकले धेरै माया गरेका छन् । यो फिल्मबाट प्रेरित एक व्यक्तिले रक्तचन्दन तस्करी गर्न गएका थिए, तर प्रहरीले भने उनलाई समात्यो ।

प्रहरीले रक्तचन्दन तस्करी गर्न खोज्ने यासिन इनायथुल्ला नामका एक व्यक्तिलाई पक्राउ गरेको छ । मायासीन इनायथुल्ला कर्नाटक–आन्ध्र सीमानाबाट महाराष्ट्रतर्फ जाँदै गर्दा रक्तचन्दन तस्करी गर्न खोजिरहेका थिए तर सीमा पार गर्ने बित्तिकै महाराष्ट्र प्रहरीले पक्राउ गरेको थियो । 

प्रहरीले उनलाई महाराष्ट्रको सांगली जिल्लाको मेराज नगरको गान्धी चोकबाट पक्राउ गरेको हो ।

प्रहरीले यासिन इनायथुल्लालाई १० लाखको ट्रक र २ करोड ४५ लाख मूल्य बराबरको चन्दनको काठसहित पक्राउ गरेको छ । सांगलीका प्रहरी उपरीक्षक दीक्षित गेडामले सो जानकारी दिएका छन् । 

गोप्य सूचनाका आधारमा वन अधिकारीसँग संयुक्त अभियान चलाएर जकात नाकामा छापा मारिएको उनले बताए । उनले अवैध चन्दन ओसारपसारको सूचना प्रहरीलाई प्राप्त भएको बताए ।

फिल्म 'पुष्पा'बाट प्रेरित भएर यासिन इनायातुल्लाले रक्तचन्दन तस्करी गर्न खोजेका थिए । उनले पहिले ट्रकमा रक्तचन्दन राखे र त्यसपछि फलफूल र तरकारीका बक्सहरू राखे । 

उनले रक्तचन्दन बोकेको ट्रकमा कोभिड–१९ अत्यावश्यक सामग्रीको स्टिकर  टाँसेका थिए । 

अहिले प्रहरीले उक्त सञ्जाल पत्ता लगाउन अनुसन्धान गरिरहेको छ । 

अहिले यो खबर बाहिर आएपछि उनको तस्वीर 'पुष्पा'सँग  जोडेर सामाजिक सञ्जालमा शेयर गरेर मानिसहरूले रमाइलो गरिरहेका छन् ।