पश्चिम नेपालको मुख्य ट्रान्जिटका रूपमा रहेको कोहलपुरमा काठमाडौंस्थित धरहराको झल्को दिने गरी १० तले भ्युटावर (दर्शनटुप्पो) को निर्माण तीव्र गतिमा भइरहेको छ ।

कोहलपुर नगरपालिका–११ गोलपार्कमा निर्माणाधीन लिफ्ट सहितको सुविधा सम्पन्न सो दर्शनटुप्पोको निर्माण कार्य ७२ प्रतिशत सम्पन्न भइसकेको र बाँकी काम पनि जारी रहेको कोहलपुर नगरपालिकाका प्रमुख लुटबहादुर रावतले बताए ।

समग्र पश्चिम नेपाल मात्र नभई भारतीय नागरिकलाई समेत आकर्षित गर्नेगरी नगरपालिकाको गौरवको योजनामा पारेर अत्याधुनिक दर्शनटुप्पोको निर्माण कार्य भइरहेको उनले बताए ।

१० तलाको उचाइसहित निर्माण भएको दर्शनटुप्पोमा समयको जानकारी गराउने उद्देश्यले ठूलो घडी राखिने बताउँदै रावतले लिफ्टबाट माथि जान सकिने र दर्शन टुप्पोबाट कोहलपुरको चारैतिरको रमणीय दृश्यावलोकन गर्न सकिने बताए । अधिकांश निर्माण पूरा भइसकेको र लिफ्ट जडानसहित रंगरोगन र सजावटको काम मात्र हुन बाँकी रहेको निर्माण कम्पनीले जनाएको छ । ५ करोड ८८ लाख रुपैयाँको लागतमा अत्याधुनिक दर्शनटुप्पो निर्माण भइरहेको कोहलपुर नगरपालिकाले जनाएको छ ।

दर्शनटुप्पोले कोहलपुर क्षेत्रमा आन्तरिक तथा बाह्य पर्यटकलाई आकर्षित गर्ने कोहलपुर नगरपालिकाका उपप्रमुख सन्जु चौधरीले बताए । उनले टावर पूर्ण रूपमा निर्माण भएर सञ्चालनमा आएपछि यसलाई हेर्न हजारौँ स्वदेशी र भारतीय नागरिक आउने बताए । ९ रेक्टर स्केलको भूकम्पले पनि क्षति नपुग्ने गरी दर्शनटुप्पो निर्माण भइरहेको कोहलपुर नगरपालिकाका पूर्वाधार विकास शाखा प्रमुख इन्जिनीयर बालकृष्ण महतराले जानकारी दिए ।

एकैपटक १५ जना जानसक्ने क्षमताको लिफ्ट जडान गरिने बताउँदै उनले दृश्यवलोकनका लागि एक पटकमा ५० जना जान सक्ने क्षमता हुने जनाए ।

कोरोना महामारीका कारण निर्धारित समयमा निर्माण कार्य पूरा नहुँदा निर्माण कम्पनी जय भवानीले थप ६ महिना म्याद थपको माग गरेको छ । भौतिक पूर्वाधार निर्माण कार्य सम्पन्न भए पनि अन्तिम फिनिसिङ कार्य सम्पन्न गर्नका लागि ६ महिना म्याद थपको माग गरिएको जय भवानी निर्माण सेवाका सञ्चालक अर्जुन पनेरुले बताए ।

निर्माण नसकिँदै दर्शनटुप्पो अवलोकन गर्न ठूलो संख्यामा सर्वसाधारण पुग्न थालेको स्थानीय वासिन्दाले जनाएका छन् । गोरखापत्रमा खबर छ ।