नयाँ दिल्ली, २०असार– घाटामा चलिरहेको एयर इण्डियाको विमानभित्र एसी बन्द हुँदा यात्रुहरुले कष्ट भोग्न बाध्य भए । विमान नयाँदिल्लीबाट बग्डोगरा जाँदै थियो ।
विमानभित्र एसी नचलेपछि यात्रुहरुले गर्मीबाट बच्न म्यागेजिनको सहाराले हावा गम्केका थिए । फ्लाइटमा एसी बिग्रेको पाइलटलाई जानकारी थियो तर विमान उडेपछि मात्रै एसी नचलेको भनेर यात्रुहरुलाई जानकारी दिएपछि यात्रुहरु निकै रिसाएका थिए ।
यात्रुहरु रिसाएर विमानभित्र विरोध शुरु गरेका थिए । साथै उनीहरुले ट्वीटर र फेसबुकमा तिक्तता समेत पोखे ।
एयर इण्डियाका प्रवक्ताले विमानको एसी बिग्रेका कारण यात्रुहरुले गुनासो गरेको जानकारी दिए । दिल्लीबाट फ्लाइट बिहान ६ बजे बग्डोगराका लागि उडेका थिए । विमान अवतरण भएसम्म पनि एसी बन्द अवस्थामा थियो ।
