काठमाडौंस्थित त्रिभुवन अन्तर्राष्ट्रिय विमानस्थलबाट अवैध विदेशी मुद्रा (अमेरिकी डलरलगायत) सहित प्रहरीले १ भारतीय नागरिकलाई पक्राउ गरेको छ । 

फ्लाई दुबईमार्फत काठमाडौंबाट दुबई जान लागेका भारतीय नागरिक शतिश परसोत्तम सजनानीलाई पक्राउ गरिएको विमानस्थल सुरक्षा कार्यालयका प्रमुख प्रहरी वरिष्ठ उपरीक्षक भीमप्रसाद ढकालले जानकारी दिए ।

अवैध रूपमा विदेशी मुद्रा लैजान लागेको भन्ने विशेष सूचनाका आधारमा अनुसन्धान गर्दा उनको हाते झोलाबाट विभिन्न देशका मुद्रा फेला परेपछि पक्राउ गरिएको उनले जानकारी दिए । उनको साथबाट प्रहरीले २० हजार अमेरिकी डलर, ३१ हजार ६०५ इङ्ल्यान्ड पाउन्ड, ५० जर्जिया लारी, १०० भारतीय रुपैयाँ र १ हजार ३०० यूएई दिराम बरामद गरेको छ । 

मंगलवार पक्राउ परेका उनलाई आवश्यक अनुसन्धान एवं कारबाहीका लागि बुधवार राजस्व अनुसन्धान विभाग ललितपुरमा बुझाइएको विमानस्थल सुरक्षा कार्यालयद्वारा जारी सूचनामा उल्लेख छ ।