अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी)सँगै त्यसको व्याख्यात्मक प्रस्ताव तयार गर्न दलहरू जुटेपछि पारित गर्न ढिलाइ हुने भएको छ । 

प्रस्ताव तयार गर्ने काम भइरहेकोले बैठक केही ढिलो हुने सञ्चारमन्त्री ज्ञानेन्द्रबहादुर कार्कीले जानकारी दिए । 

विवादित बुँदामा व्याख्यात्मक टिप्पणीसहितको प्रस्ताव पारित गर्ने गठबन्धन बैठकमा सहमति भएको थियो । संसद भवन परिसरमा पुगेका कार्कीले सो प्रस्तावमा छलफल भइरहेको जानकारी दिए । सोही कारण प्रतिनिधि सभाको बैठक ढिला हुने भएको हो । 

प्रतिनिधि सभाको बैठक दिउँसो १ बजेका लागि बोलाइएकोमा नेकपा माओवादी केन्द्र र नेकपा एस आन्तरिक छलफलमा छन् ।

माओवादी संसदीय दलको बैठक संसद भवनकै ल्होत्से हलमा बसिरहेको छ भने नेकपा एसको स्थायी कमिटी बैठक पनि बानेश्वरकै एक पार्टी प्यालेसमा चलिरहेको छ । संसद्का दुई वटा बैठक राखेर एमसीसी आजै पारित गर्ने सरकारको तयारी छ । 

प्रतिनिधि सभाको बैठकअघि कार्यव्यवस्था परामर्श समितिको बैठक बस्दैछ । माओवादी संसदीय दलको बैठक लगत्तै कार्यव्यवस्थाको बैठक राख्ने तयारी रहेको संसद सचिवालय स्रोतले जानकारी दियो ।