युक्रेनको राजधानी किएभबाट उत्तरपश्चिममा रहेको इर्पिनमा रुसी र युक्रेनी सैनिकबीच भिडन्त भइरहेको छ । 

रुसको आक्रमणलाई रोकेको युक्रेनले दाबी गरेको छ । 

उक्त क्षेत्रमा युक्रेनी सेनाको नियन्त्रण कायम रहेमा लभिभ शहर र पोल्यान्ड सीमाबीचका दुईवटा राजमार्गमा युक्रेन हावी रहन्छ । 

युक्रेनको पश्चिमी भागलाई रुसले कब्जा गर्न नसकेमा उसको रणनीति विफल हुन्छ किनकि त्यही बाटो भएर किएभले पोल्यान्डमार्फत सहायता अविच्छिन्न रूपमा भित्र्याउन पाउँछ । त्यसो हुन नदिनका लागि रुसी सेना त्यतातिर बढिरहेको छ तर युक्रेनले शहरी युद्धकला अपनाएकाले रुसी सैनिकहरूलाई अघि बढ्न गाह्रो परिरहेको छ । 

युक्रेनीहरू रुससँग आमनेसामने भिडन्त गर्न खोजिरहेका छैनन् । रुसमाथि प्रत्याक्रमणको प्रयास पनि उनीहरूले गरेका छैनन् । उनीहरू शहरी युद्धकलामार्फत रुसी सैनिकहरूलाई रोकेर अधिकतम क्षति पुर्‍याउने कोशिश गरिरहेका छन् ।