२८ जेठ २०८३, बिहीबार
नेपाल कम्युनिस्ट पार्टी (माओवादी केन्द्र)ले आइतबार पदाधिकारी र स्थायी समिति चयन गर्ने भएको छ ।
शुक्रबारको बैठकमा एमसीसीलगायतका समसामयिक विषयमा छलफल भएपछि अब बैठकको कार्यसूची पदाधिकारी चयनलगायतका साङ्गठनिक विषयमा प्रवेश गरेको छ ।
आइतबारको बैठकमा यी विषयमा टुङ्गो लाग्ने नेताहरूले बताएका छन्। आइतबारको बैठक कार्ययोजना र सङ्गठनको पूर्णतामा केन्द्रित हुनेछ ।
माओवादी केन्द्रका केन्द्रीय कार्यालय सचिव श्रीराम ढकालले भने, “बैठकको कार्यसूची अब कार्ययोजना निर्माण र सङ्गठन हो । पदाधिकारी चयन पनि सङ्गठनभित्रै पर्ने एजेन्डा हो, आइतबार टुङ्गो लाग्ने अत्यधिक सम्भावना छ ।”
पुस १८ गते सम्पन्न माओवादीको आठौँ महाधिवेशनले २४७ केन्द्रीय सदस्य चयन गरेको थियो ।
लगत्तै पुस १९ गतेको केन्द्रीय समितिको बैठकले पुष्पकमल दाहाल ।।।प्रचण्ड’लाई अध्यक्ष चयन गरेको थियो । अन्य पदाधिकारी हालसम्म चयन भएको छैन । माओवादीमा निर्वाचित केन्द्रीय समितिले पदाधिकारी चयन गर्ने व्यवस्था छ ।
माओवादी केन्द्रका नेता देव गुरुङले आइतबारको बैठकमा सहमति भए पदाधिकारी चयन हुन सक्ने बताए ।
सङ्गठन र कार्ययोजनाबारे बैठक केन्द्रित हुने चर्चा गर्दै नेता गुरुङले भन्नुभयो, “पदाधिकारी चयन गर्ने कुरा सहमति भए हुन्छ, नभए हुँदैन, सहमति भइसकेको कुरा मलाई जानकारी छैन । ”
केन्द्रीय समितिलाई पूर्णता दिने काम पनि बैठकबाट हुने सम्भावना छ । २९९ केन्द्रीय सदस्यमा २४७ मात्र चयन भएका छन् । २९९ मा १० प्रतिशत हेडक्वार्टरले मनोनीत गर्ने व्यवस्था छ । त्यो पनि बाँकी छ । २९९ को १५ प्रतिशत केन्द्रीय समितिले मनोनीत गर्ने काम पनि बाँकी छ ।
महाधिवेशनका बाँकी काम सम्पन्न गरिने नेता देव गुरुङले बताए । महाधिवेशनमा पदाधिकारी दाबी गर्नेको सङ्ख्या धेरै भएपछि केन्द्रीय समितिमात्र चयन गरी सम्पन्न गरिएको थियो । पदाधिकारी दाबी गर्ने नेताको व्यवस्थापन गर्न पदाधिकारी सङ्ख्या महाधिवेशनबाटै थपिएको छ ।
जसअनुसार अध्यक्ष, एक जना वरिष्ठ उपाध्यक्ष, सात जना उपाध्यक्ष, एक महासचिव, दुई उपमहासचिव, तीन सचिव र कोषाध्यक्ष रहने व्यवस्था गरिएको छ । तर, अन्य पदभन्दा महासचिवमा नेताहरूले महìव दिएको पाइन्छ । महाधिवेशनका बेला देव गुरुङ, पम्फा भुसाल, हरिबोल गजुरेल, जनार्दन शर्मा र वर्षमान पुनलगायतका नेताको महासचिव दाबी थियो तर पछिल्लो समयमा जनार्दन शर्मा र वर्षमान पुनको चर्चा बढी हुने गरेको छ । लक्ष्मण दर्नालले गोरखापत्र दैनिकमा खबर लेखेका छन् ।
