प्रतिनिधि सभाले आइतवारको बैठकबाट महाभियोग सिफारिश समिति गठनको तयारी गरेको छ । प्रधानन्यायाधीश चोलेन्द्रशमशेर जबराविरुद्ध दर्ता भएको महाभियोग प्रस्तावलाई अगाडि बढाउन समिति गठन गर्न लागिएको हो । 

प्रतिनिधि सभाको बैठकअघि बसेको कार्यव्यवस्था परामर्श समितिको बैठकमा महाभियोग सिफारिश समिति गठन गर्नेबारे छलफल भएको थियो । 

११ सदस्यीय महाभियोग सिफारिश समितिमा नेकपा एमालेबाट ४, कांग्रेस र माओवादी केन्द्रका तर्फबाट दुई /दुई तथा नेकपा एकीकृत समाजवादी, जसपा र लोसपाबाट एक–एक सदस्य रहने संसद सचिवालयका एक अधिकारीले लोकान्तरलाई जानकारी दिए । 

अहिलेसम्म कांग्रेस, माओवादी, जसपा र लोसपाले समितिमा रहने सदस्यको नाम दिएका छन् । एमालेको नाम आए सभामुख अग्नि सापकोटाले सिफारिश समिति गठनको निर्णय सुनाउने छन् । 

चोलेन्द्रविरुद्ध फागुन १ गते ९८ जना सांसदले महाभियोग प्रस्ताव दर्ता गराएका थिए ।