नेपाली काँग्रेस धनुषाको नयाँ नेतृत्व चयनका लागि भएको निर्वाचनमा शेखर कोइराला समूहका उम्मेदवार दिनेश प्रसैला यादवले विमलेन्द्र निधि समूहका उम्मेदवार योगेन्द्र पजियारलाई समर्थन गरेका छन् । पहिलो चरणको निर्वाचनमा तीन उम्मेदवार मध्ये कसैले पनि ५० प्रतिशत मत कटाउन नसकेपछि हुन लागेको दोस्रो चरणको निर्वाचनमा कोइराला र निधि पक्ष मिलेका हुन् । निधि पक्षका नेता रामसराेज यादवले  दिनेश प्रसैला यादवले ​पजियारलाई समर्थन ​गर्ने सहमति भएको लाेकान्तरलाई जानकारी दिए ।

दोस्रो चरणको निर्वाचनमा देउवा पक्ष र कोइराला–निधि पक्षबीच प्रतिस्पर्धा हुने निश्चित भएको छ । पहिलो चरणको निर्वाचनको मतपरिणामअनुसार शेरबहादुर देउवा  पक्षका उम्मेदवार सन्तोष यादव दोस्रो स्थानमा थिए । 

दोस्रो चरणको निर्वाचन बिहीबार हुनेछ । 

 तीन उम्मेदवारमध्ये पहिलो चरणको निर्वाचनमा निधि निकट योगेन्द्र पजियारले सर्वाधिक मत १ हजार २४८ पाएका थिए ।  यस्तै देउवा पक्षका सन्तोषकुमार यादवले ८८३ र कोइराला समूहका दिनेशप्रसाद प्रसैला यादवले ६३० मत ल्याएका थिए । 
 कुल मत २ हजार ९१२ मत खसेकामा १५१ मत बदर भएको थियो ।