०२ असार २०८३, मंगलबार
काभ्रेपलाञ्चोकको विकट डाँडापारिस्थित महाभारत गाउँपालिका–६ का घ्याब्रिङ र बालखोपका वासिन्दालाई धारा वितरण गरिएको छ ।
बागमती प्रदेश सरकारको आर्थिक वर्ष २०७७/०७८ को प्रदेश विशेष अनुदान र गाउँपालिकाको साझेदारी बजेटबाट त्यहाँका ५३ घर परिवार र एक विद्यालयलाई ‘एक घर, एक धारा’ खानेपानी वितरण गरेपछि सो ठाउँका ३८० वासिन्दाले खानेपानी उपभोग गर्न पाएका हुन् ।
वडा नम्बर ६ का वडाध्यक्ष रमेश लुङ्गेलीले खानेपानीको समस्या झेल्दै आएको सो ठाउँका लागि प्रदेश सरकार र गाउँपालिकाको सहयोगमा खानेपानीको व्यवस्था गरिदिएपछि स्थानीयमा थप खुशीको लहर छाएको बताए ।
विगतमा सामूहिक धारा हँुदा एकैपटक धेरै जना पानी थाप्नका लागि जम्मा हुँदा विवाद झेल्नुपर्ने अवस्था रहेकोमा अब ‘एक घर, एक धारा’ले त्यसको अन्त्य भएको उनले बताए ।
करीब साढे ३ किलोमिटर टाढाको बालखोप मुहानबाट मूल पाइप बिछ्याएर ३ ठाउँमा पानी ट्यांकी निर्माण गरी घरघरमा खानेपानी पुर्याइएको गाउँपालिकाका सवइन्जिनीयर प्रकाश खड्काले बताए । सो आयोजना सम्पन्न गर्नका लागि ४६ लाख ५० हजार ५०० रुपैयाँको लागतमा मुख्य पाइपलाइन र वितरण पाइप लाइन गरी करीब ११ किलोमिटर पाइपलाइन बिछ्याएर खानेपानी धारा वितरण गरिएको उनले बताए ।
गाउँपालिका अध्यक्ष कान्छालाल जिम्बाले मानिसको जीवनसँग सम्बन्धित रहेको खानेपानी आयोजना सम्पन्न गर्नको लागि प्राप्त बजेटले बालखोपका स्थानीयलाई लाभान्वित बनाउन सफल भएको बताए ।
बागमती प्रदेश आर्थिक मामिला तथा योजना मन्त्रालयका सचिव धनिराम शर्माले दुर्गम गाउँपालिकाको विकट गाउँका वासिन्दालाई प्रदेश सरकारको साझेदारीमा खानेपानी उपलब्ध गराउन सफल भएको बताए ।
