१८ असार २०८३, बिहीबार
संखुवासभाको मादी नगरपालिकामा बिहीवार भएको बस दुर्घटनामा १४ जनाको मृत्यु भएको छ । ५ जना घाइते भएका छन् ।
संखुवासभाबाट झापाको दमक जाँदै गरेको बस मादी नगरपालिका-६ सातघुम्ती भन्ने ठाउँमा दुर्घटना भएको हो । घटनामा मृत्यु हुने अधिकांश मादी नगरपालिकाका रहेको दुर्घटना भएको मादी नगरपालिका वडा नम्बर ६ का वडाध्यक्ष धननारायण तामाङले लोकान्तरलाई जानकारी दिए ।
‘दुर्घटनामा मृत्यु भएका १४ जनालाई पोष्टमार्टमका लागि जिल्ला अस्पताल पठाइएको छ, घाइते ५ जना मध्ये २ जनाको अवस्था गम्भीर छ,’ तामाङले भने, ‘बाटो पक्की भए पनि घटनास्थल भएको ठाउँ घुम्ती नै घुम्ती छ, कसरी दुर्घटना भयो भन्ने प्रहरीले अनुसन्धान गरिरहेको छ ।’
घटनास्थलमा रहेका वडाध्यक्ष तामाङले बस सडकबाट २०० मिटर तल खसेको जानकारी दिए । संखुवासभाका प्रमुख जिल्ला अधिकारी नुरहरि खतिवडाले पनि दुर्घटनामा १४ जनाको मृत्यु भएको पुष्टि गरेका छन् ।
