विवाह सकेर जन्तीसहित घर फर्किँदै गर्दा दुर्घटनामा परेर घाइते भएका बेहुला दानबहादुर खड्का र बेहुली रिमा जिसी ३३ दिन अस्पताल बसेर घर फर्किएका छन् । 

गएको माघ २२ गते प्युठानको गौमुखी गाउँपालिका वडा नम्बर– ६ लिवाङमा जन्ती बोकेको जीप दुर्घटना हुँदा आठ जनाले ज्यान गुमाएका थिए भने बेहुला/बेहुलीसहित पाँचजना घाइते थिए । 

नयाँ जीवन शुरूआत गर्दैगर्दाको अकल्पनीय घाउको खाटो बस्न थालेपछि उनीहरू बिहीवार फकिएका हुन् ।

जीवनभर कहिल्यै नमेटिने तीतो अनुभव सँगालेर अस्पतालबाट बाहिरिँदै गर्दा रिमा भावविह्वल बनिन् । कुरा गर्न खोज्दा उनको आवाज बन्द भयो । 

एकछिन रोकिएपछि उनले भनिन्, ‘यस्तो अकल्पनीय घटना भयो । मेरो एउटा हात गुमेको छ । श्रीमानलाई त्यति ठूलो चोट छैन । तीतो अनुभवलाई भुलेर बाँकी जीवन जिउनुको विकल्प हामीसँग रहेन ।’

रिमालाई अहिले गाडी चढ्दा निकै डर लाग्न थालेको छ ।

नयाँ संसारमा रमाउनुपर्ने दिन घटेको दुःखद् घटनाले महिना दिनसम्म उनलाई अस्पतालमा बसायो ।

अब चैत ३ गतेमात्र उनी कर्मघर पुग्नेछिन् ।

‘आउँदो चैत ३ गते मात्र लिवाङ (घर) जाने हो । त्यतिबेलासम्म लुङ (माइतीघर) नै बस्छौं ।’ 

घरदेखि झन्डै दुई घण्टाको दूरीमा रहेको लुङ पुगी रिमासँग लगनगाँठो कसेका दानबहादुरले श्रीमतीलाई अझै घर भित्र्याउन पाएका छैनन् । 

दानबहादुरलाई दुर्घटनाग्रस्त जीपले थिचेको थियो भने रिमाको हात कामै नलाग्ने गरी किचिएको थियो ।

रिमाको दाहिने हात कुहिनोबाट तलतिर काटेर फालिएको छ ।

दानबहादुरलाई बाहिर देखिने चोट नभए पनि ढाडको दुखाइ अझै पनि निको भएको छैन ।

रूपन्देहीको भैरहवास्थित युनिभर्सल कलेज अफ मेडिकल साइन्सेजमा ३३ दिन उपचार गराएर उनीहरू कम्तिमा घर फर्किन सक्ने भएका छन् ।

दुर्घटनाबारे छैन धेरै सम्झना, होशमा आउँदा अस्पतालमा

गाडी दुर्घटनामा पर्दाको क्षण लौ लड्यो भन्ने आवाजबाहेक अरू केही पनि उनीहरूलाई याद रहेन छ ।

होशमा आउँदा आफूहरूलाई अस्पतालको बेडमा पाएको उनीहरूले बताए ।

रिमाको माइती घरबाट नौबहिनी गाउँपालिका वडा नम्बर ६ लुङबाट लिवाङतर्फ जाँदै गर्दा राति १ बजेतिर जीप दुर्घटनामा परेको थियो ।

दानबहादुले विवाहको दिन भएको कहालीलाग्दो घटनाले मनमा ठूलो चोट पुगेको बताए । आफूहरू ठूलो भाग्यले बाँचेको खड्काले बताए ।

दुलहीका दाजु सुदन जिसीले बहिनीज्वाइँ महिना दिनभन्दा बढीको अस्पताल बसाइपछि बिहीवार घर फर्किएको बताए । 

सुदनले लोकान्तरसँग भने, ‘ज्वाइँका काका (वसन्त खड्का)ले पानी र हिउँले बाटो हिलो छ, राति नहिँडौं त भन्नुभएको थियो । तर लेखेको कुरा जसरी पनि भइछाड्ने रहेछ ।’  

दुलहीसँगै गएकी सुदनकी श्रीमती सावित्रा पनि घाइते थिइन् । उनको अहिले पनि भैरहवामा उपचार भइरहेको छ । 

दुर्घटनामा बेहुलाका काका वसन्त, उनकी श्रीमती र छोरीसहित ८ जनाले ज्यान गुमाएका थिए । 

२१ वर्षिया रिमा कक्षा १० मा अध्ययनरत छिन् । 

रातिको विवाह भएकाले जन्तीको जीप साँझ ४ बजेमात्र घरबाट हिँडेको थियो । विवाह सकेर सोही राति ११ बजे बेहुलीसँगै बेहुलीकी बहिनी र भाउजूलाई पनि लिएर जन्तीको जीप बेहुलाको घरतर्फ फर्कियो । 

खड्का निवासमा बुहारी आउने रौनकसँगै नाचगान भइरहेको थियो । श्रीमती लिएर फर्किएका दानबहादुर पनि खुशी थिए ।

जीपमा जन्ती समूहका आफन्ती रमाइलो गर्दै आइरहेका थिए । घर पुग्न १० मिनेट बाँकी हुँदा अकल्पनीय घटना घट्यो । जीप सडकदेखि ३०० मिटर तल खोलामा खस्यो । 

बेहुली आउने समयमा दुःखद् खबर आएपछि सिंगो परिवार शोकाकुल बन्यो ।

उपचारका लागि रिमालाई दुई लाख र दानबहादुरलाई ६० हजार खर्च लागेको छ । होटलमा खाना खाँदा ५० हजार खर्च भएको रिमाका बुवा गोविन्दले बताए ।

दुर्घटनामा परी ग १ ज ५०९२ नम्बरको जीप धुजाधुजा भएको थियो ।

दानबहादुरले गाउँमै कृषि पेशा गर्दै आइरहेका छन् । 

भाग्यले बाँचेको जीवन गाउँमै केही उद्यम गरेर सुख-दुःखका साथ बिताउने उनले बताए ।

त्यसका लागि सबैको हौसला आवश्यक रहेको उनको भनाइ छ ।