२३ जेठ २०८३, शनिबार
लुम्बिनी प्रदेशका प्रदेश प्रमुख अमिक शेरचनले बिहीबार राप्ती स्वास्थ्य विज्ञान प्रतिष्ठान घोराहीको स्थलगत अवलोकन तथा निरीक्षण गरेका छन् ।
उनले जनताको स्वास्थ्य र शिक्षासँग जोडिएको प्रतिष्ठानको विकासका लागि पहल गर्ने बताए ।
प्रदेश प्रमुख शेरचनले आफू स्वास्थ्यमन्त्री हुँदा अस्पतालको स्तरोन्नतिका लागि निर्णय गरेको बताउँदै गुरुयोजनाअनुसार बन्ने ४०० शय्याको अस्पतालको भौतिक पूर्वाधार विकासका लागि बजेट प्रदान गर्न केन्द्र र प्रदेश सरकारलाई आग्रह गर्ने बताए ।
राप्ती स्वास्थ्य विज्ञान प्रतिष्ठानमा शैक्षिक सत्रदेखि शुरू हुने बीएस्सी नर्सिङ, बीएनएस र ब्याचलर अफ फार्मेसी शैक्षिक कार्यक्रममा पठनपाठन सञ्चालन गरिने भएको छ । सोहीअनुरूप ती कार्यक्रम सञ्चालन गर्न आवश्यक पर्ने भौतिक पूर्वाधार (लेक्चर हल, अडिटोरियम हल, फ्याकल्टी रुम, ल्याब, फार्मेसी, पुस्तकालय तथा छात्रावास) र जनशक्तिबारे प्रतिष्ठानका शिक्षाध्यक्ष डा. वसन्त लामिछानेले जानकारी गराएका थिए ।
सो अवसरमा प्रतिष्ठानका अस्पताल निर्देशक डा. प्रज्ञा बस्नेत, मेडिकल डाइरेक्टर डा. रमेश कँडेल, डीन डा. सागर पन्थी, सहायक निर्देशक डा. एन्जिलिका कार्की लगायतको उपस्थिति थियो ।
