०५ असार २०८३, शुक्रबार
नेपाल तेलको लागि आवश्यक कच्चा पदार्थ खरीद गर्दा नै महँगो मूल्य खर्चनु परेका कारण खानेतेलमा समेत मूल्यवृद्धि भएको छ ।
अन्तर्राष्ट्रिय बजारबाट नेपाल भित्रँदै कच्चा पदार्थ महँगिएका कारण नेपालमा पनि खाने तेलको मूल्यवृद्धि भएको नेपाल वनस्पति घ्यू तथा तेल उत्पादक संघले जानकारी दिएको छ ।
संघका अनुसार नेपालमा भित्रने तेलको कच्चा पदार्थ क्रुड सोयाविन, सनफ्लावर, पाम आयल र गेडा तोरी शतप्रतिशत आयात हुने गरेको छ ।
यी वस्तुको आयात ब्राजिल, अर्जेन्टिना, क्यानडा, अस्ट्रेलिया, युक्रेनसहितबाट आउने गरेको छ ।
यी वस्तुमा क्रुड सनफ्लावर तेल ९५ देखि शतप्रतिशत र तोरीको गेडा ६० देखि ८० प्रतिशत युक्रेनबाट मात्रै आउने गरेको छ ।
हाल रसिया युक्रेन युद्धका कारण आयात प्रभावित भएको हुँदा नेपालमा तेलको मूल्यवृद्धि भएको पनि संघको भनाइ छ ।
कच्चा तेलमा भएको मूल्यवृद्धिकै कारण नेपालमा पनि ४० देखि ५० प्रतिशतसम्मले खाने तेलको मूल्य बढेको छ ।
नेपालमा हाल विभिन्न २२ वटा उद्योगले खानेतेलको प्रशोधन गरेर बजारमा बिक्री वितरणको लागि पठाउने गरेका छन् ।
