१० असार २०८३, बुधबार
युक्रेनको मेलितोपोल शहरमा निर्वाचित मेयर इभान फेदोरोभलाई अपहरण गरेर रुसी सेनाले नयाँ मेयर राखेको दाबी गरिएको छ ।
राष्ट्रपति भोलोदीमीर जेलेन्स्कीले रुसी बलका १० सशस्त्र मानिसले फेदोरोभलाई अपहरण गरेर हिरासतमा लिएको बताए । युक्रेनको परराष्ट्र मन्त्रालयले फेदोरोभलाई थुनामा राख्ने काम अपहरण र युद्ध अपराध भएको बताएको छ ।
मेलितोपोलमा गालिना ड्यानिलचेन्कोलाई मेयर बनाइएको छ । उनी नगर परिषद्की पूर्व सदस्य हुन् ।
उनलाई स्थानीय टेलिभिजनमा कार्यवाहक मेयरका रूपमा परिचय दिइएको बताइन्छ । उनले शहरलाई सामान्य अवस्थामा फर्काउन सबै आवश्यक कदम चाल्ने बयान जारी गरिन् ।
मेलितोपोलमा परिस्थिति खलबल्याउने र उत्तेजक कार्य गर्ने सम्भावना भएका मानिस अझै पनि रहेको दाबी पनि उनले गरिन् ।
तर त्यस्ता उत्तेजक गतिविधिको पछि नलाग्न उनले नगरवासीलाई आग्रह गरेकी छन् ।
