०६ असार २०८३, शनिबार
प्रधानमन्त्री कृषि आधुनिकीकरण परियोजनाले सहकारीमार्फत हालसम्म आठ हजार १९२ मेट्रिक टन धान खरिद गरेको छ ।
चालू आर्थिक वर्षमा सरकारले तोकेको न्यूनतम समर्थन मूल्यका आधारमा विभिन्न जिल्लाबाट उक्त धान खरिद गरिएको परियोजनाका सूचना अधिकारी हिक्मतकुमार श्रेष्ठले बताए ।
झापा, सुनसरी, चितवन, मकवानपुर, बारा, रौतहट, रुपन्देही र बर्दिया जिल्लाका गाउँपालिका तथा नगरपालिकाका किसानबाट सहकारीमार्फत धान खरिद गर्ने काम भएको उनले जानकारी दिए ।
कतिपय ठाउँमा अझै खरिद गर्ने कार्य जारी रहेको बताउँदै उनले सरकारले निर्धारण गरेको न्यूनतम समर्थन मूल्यमा धान खरिद गर्ने सहकारीलाई सरकारले खरिद गरेको धानको भण्डारण, सुरक्षा र प्याकेजिङलगायतका खर्च व्यवस्थापनका लागि अनुदान दिने गरेको बताए ।
सरकारले चालू आर्थिक वर्षका लागि मोटा धानको प्रतिक्विन्टल मूल्य दुई हजार ७५२ रुपियाँ र मध्यम किसिमको धानको मूल्य दुई हजार ९०२ रुपियाँ तोकिएको छ । गोरखापत्र दैनिकमा खबर छ ।
