नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशमा ४०/५० वर्ष शासन गर्नको लागि नेकपा बनाएको भएपनि केपी ओलीका कारण असफल भएको बताएका छन् । 

नायक बनाउन खोजेको व्यक्ति खलनायक बनेको उनले आरोप लगाए । 

माओवादीले सोमवार रोल्पामा आयोजना गरेको जनसभालाई सम्बोधन गर्दै प्रचण्डले केपी ओलीको नाम नलिइ नायक बनाउन खोजेको व्यक्ति खलनायक बनेको आरोप लगाएका हुन् । 

‘रोल्पाली जनसमुदायको अगाडि भन्नै पर्छ, जे सपना देखेर नेकपा बनाएका थियौं, ४०–५० वर्ष शासन गरौँला भनेर । जसलाई धोइ पखाली नायक बनाउन खोजेको खलनायक र विदेशी दलाल देखापरे,’ प्रचण्डले भने । 

पार्टीभित्रको अन्तरसंघर्षमा पराजित भएपछि ओलीले राष्ट्रिय अन्तर्राष्ट्रिय सेटिङ गरेर संसद विघटन गराएको आरोप लगाए । 

‘पार्टीभित्रको अन्तरसंघर्षमा ७० प्रतिशत हाम्रो पक्षमा थियो । प्रधानमन्त्री हटाउने भनेर बहुमत सांसदको हस्ताक्षर भएको थियो । राष्ट्रिय अन्तर्राष्ट्रिय सेटिङ र षडयन्त्रका कारण निर्वाचन आयोगले समयमा निर्णय नदिँदा सफल हुन सकेन,’ प्रचण्डले भने ।

संविधान र संघीय लोकतान्त्रिक गणतन्त्र उल्टाउने षडयन्त्र भएपनि आफू काठमाडौंका सडकमा नारा लगाउँदै हिड्नुपर्ने अवस्था आएको प्रचण्डले बताए ।