१० असार २०८३, बुधबार
पञ्चेश्वर परियोजनालाई तीव्र गतिमा अघि बढाउन भारत सहमत भएको छ । प्रधानमन्त्री शेरबहादुर देउवाको भारत भ्रमणको क्रममा भएको द्विपक्षीय छलफलमा भारत पञ्चेश्वर आयोजना अघि बढाउन सहमत भएको भारतीय प्रधानमन्त्री नरेन्द्र मोदीले बताए ।
द्विपक्षीय छलफल पछि आयोजित संयुक्त पत्रकार सम्मेलनमा सम्बोधनको क्रममा भारतीय प्रधानमन्त्री मोदीले पञ्चेश्वर आयोजना तीब्र गतिमा अगाडि बढाउने बारेमा कुराकानी भएको बताए ।
मोदीले भने, ‘उर्जा क्षेत्रमा अवसरको लाभ लिनुपर्छ भन्नेमा हामी सहमत भएका छौं । पञ्चेश्वर तीव्र गतिमा अगाडि बढाउने विषयमा हाम्रो जोड रहेको छ । विकासका लागि पञ्चेश्वर गेम चेन्जर परियोजना हुनेछ ।’
भारत भ्रमणमा रहेका प्रधानमन्त्री देउवा र मोदीबीच हैदराबाद हाउसमा भेटवार्ता भएको थियो । लगतै प्रतिनिधिमण्डल स्तरमा छलफल हुनुका साथै चार समझदारीमा हस्ताक्षर भएको छ ।
पत्रकार सम्मेलनलाई सम्बोधन गर्दै भारतीय प्रधानमन्त्री मोदीले नेपालका प्रधानमन्त्री देउवासँग नेपाल भारतको हितको सबै विषयमा कुरा भएको मोदीले बताए ।
आपसी सहयोग, विकास परियोजनाहरुको अहिलेसम्मको समीक्षा र भविष्यको रुपरेखाबारे पनि छलफल भएको उनले बताए ।
सम्बोधनको क्रममा भारतीय प्रधानमन्त्री मोदीले भारत नेपाल सम्बन्ध विश्वमै उदाहरणीय भएको बताएका छन् । देउवाको भ्रमणबाट नेपाल–भारत सम्बन्धमा नयाँ आयाम थपिएको मोदीको भनाइृ थियो । ‘देउवाजी भारतको पुरानो मित्र, प्रधामन्त्रीको रुपमा पाँचौ यात्रा गर्नुभएको छ । नेपाल भारत विकासमा भारतको सधै सहयोग रहदै आएको छ’ मोदीले भने ।
