नेकपा एमालेका अध्यक्ष केपी शर्मा ओलीले सत्तारुढ पाँच दलीय गठबन्धनलाई चिडियाखानाको गधासँग तुलना गर्दै किस्सा सुनाएका छन् । 

प्रधानमन्त्री शेरबहादुर देउवाले मंगलवार चोभारमा शिलान्यास गरेको सुख्खा बन्दरगाह शिलान्यासका क्रममा कांग्रेसले अवरोध गरेको स्मरण गर्दै ओलीले चिडियाखानाको गधाको किस्सा सुनाएका हुन् । 

नेपाल राष्ट्रिय उद्योग व्यवसाय महासंघको दोस्रो महाधिवेशनलाई बुधवार काठमाडौंमा सम्बोधन गर्दै अध्यक्ष ओलीले गठबन्धनका दलहरू शिलान्यासको बेला विरोध गर्ने र उद्घाटन गर्ने बेलामा मात्र महत्त्व बुझ्ने गरेको बताएका हुन् । 

गठबन्धनको विरोधमा ओलीले सुनाए यस्तो किस्सा

मान्छेहरू चिडियाखानामा गएछन्, चिडियाखाना हेर्न । चिडियाखानामा जनावरको सरसल्लाह भइरहेको हुँदो हो, सबै जनावर हाँस्दा रहेछन् । त्यहाँ रहेको एउटा गधा चुप्प लागेर बसेको रहेछ । तिनै मान्छेहरू भोलि या पर्सिपल्ट फेरि चिडियाखाना गएछन्, गधा एक्लै मरिमरि हाँसेको । अरू जनावर हिजै कुरो बुझे हिजै हाँसे, गधाले आज कुरो बुझेछ र हाँसेको रहेछ । 

‘गठबन्धनका दलहरू शिलान्यास गर्ने बेलामा विरोध गर्छन्, उद्घाटन गर्ने बेलामा कुरा बुझ्छन् । आज कुरा गर्दा चुप लाग्छन्, भोलि खितिति हाँस्छन्,’ गठबन्धनप्रति आरोपित गर्दै ओलीले भने । 

ओलीले एमाले अहिले केही समयका लागि प्रतिपक्षमा रहे पनि चुनावपछि फेरि सरकारको नेतृत्व गर्ने दाबी गरे ।