मन्त्रिपरिषद्का पूर्व अध्यक्ष खिलराज रेग्मीले भोलिदेखि शुरू हुन लागेको नयाँ वर्ष २०७९ साल राजनीतिक स्थिरतासहित सबल राष्ट्रको रूपमा पहिचान दिँदै अघि बढ्न सफल हुने विश्वास व्यक्त गरेका छन् ।

उनले वैशाख ३० गते हुने स्थानीय तहको निर्वाचनमा आचारसंहिताको परिपालना र निर्वाचनलाई कम खर्चिलो बनाई स्वच्छ र निष्पक्ष बनाउनु पर्ने बताए । 

नयाँ वर्ष २०७९ को शुभकामना दिँदै रेग्मीले प्रत्यक्ष प्रजातन्त्रको प्रारूप मानिने स्थानीय निर्वाचनमा राजनीतिक दलहरूले योग्य र राम्रा मान्छे उमेदवार छान्ने विश्वास व्यक्त गरेका हुन् । 

‘यो वर्ष निर्वाचन वर्षको रूपमा आउँदैछ । पहिलो निर्वाचन स्थानीय पालिकहरूको छ– वैशाख ३० गते । राजनीति जनताकै बलमा जनताकै लागि गरिने हो । स्थानीय निर्वाचनलाई प्रत्यक्ष प्रजातन्त्रको प्रारूप पनि मान्न सकिन्छ । राजनीतिक दलहरूले हाम्रा मान्छे होइन योग्य र राम्रा मान्छे उमेदवार छान्ने र प्रत्यक्ष देखेभोगेका जनताले पनि निष्कलंक, कर्मशील एवं जनताको सुख दुःखप्रति प्रतिबद्ध व्यक्ति छान्न सके गाउँकै विकास र भलाइ हुन्छ भन्ने कुरा अब पनि नबुझे कहिले बुझ्ने ?’ रेग्मीले शुभकामना सन्देशमा भनेका छन्, ‘अनि पछि परिणाम राम्रो खोज्ने, गुनासो गर्ने ठाउँ कहाँ पो रहन्छ र आफैं चुकेपछि । वस्तुतः आचारसंहिताको परिपालना र निर्वाचनलाई कम खर्चिलो बनाइ स्वच्छ र निष्पक्ष बनाउनु आजको आवश्यकता हो ।’

पूर्वअध्यक्ष रेग्मीले अन्तर्राष्ट्रिय सम्बन्धका दृष्टिले बढी सन्तुलित एवं विश्वसनीय सबल राष्ट्रको रूपमा पहिचान दिँदै अघि बढ्नुपर्ने उल्लेख गरेका छन् । ‘सकारात्मक सोच र दृढ इच्छाशक्तिका साथ विगतका कमी कमजोरीको समीक्षा गर्दै बिग्रँदो अर्थतन्त्रलाई बेलैमा सम्हाल्दै राजनीतिक दलहरू, नेतृत्व तहका व्यक्तिहरू र नेपाली मात्रले यो २०७९ सालमा राजनीतिक रूपले स्थिर र सबल, विकास र समृद्धिका सही नीति र कार्यदिशा अवलम्बन गरी अन्तर्राष्ट्रिय सम्बन्धका दृष्टिले बढी सन्तुलित एवं विश्वसनीय बनाई स्वस्थ एवं सबल राष्ट्रको रूपमा पहिचान दिँदै अघि बढ्न सफल होऔं भन्ने कामना गर्दछु,’ रेग्मीले भनेका छन् । 

२०७० सालमा संविधानसभाको सफल चुनाव गर्ने सरकारको नेतृत्व गरेका मन्त्रिपरिषद्का पूर्वअध्यक्ष रेग्मीले जनताको सुख, शान्ति र समृद्धि नै राज्यको मुख्य उद्देश्य हुनुपर्ने बताएका छन् ।

‘तर हामी त्यसतर्फ कति केन्द्रित भयौं समिक्षा गर्नुपर्ने आवश्यकता छ । खेतबारी बाँझो राखेर विदेशी श्रम बजारमा नौजवान पाखुराहरू पठाएर दिगो विकास र समृद्धि कसरी आउला र ?’ शुभकामना मन्तव्यमा रेग्मीले भनेका छन्, ‘विप्रेषणले आयातमुखी अर्थतन्त्र र उपभोक्तावादी संस्कृतिलाई बढावा दिने हो । उत्पादकत्व वृद्धि र रोजगारीमूलक आर्थिक विकासका गतिविधि निर्माण नगरेसम्म सेवा र सुविधाको नाममा वितरणमुखी बजेटको प्रवृत्ति र नीति रहेसम्म ऋण र अनुदानले आत्मनिर्भर होइन परमुखापेक्षी नै बनाउने हो ।’

पूर्वप्रधानन्यायाधीश समेत रहेका रेग्मीले राजनैतिक रूपले असंगतिपूर्ण अवस्थामा पुग्दा कार्यपालिका, न्यायपालिका र संसद् लगायत धेरै क्षेत्र लथालिंग अवस्थाउन्मुख रहेको भन्दै चिन्ता व्यक्त गरेका छन् ।