२३ असार २०८३, मंगलबार
काठमाडौं महानगरबाट फोहोर बोकेका गाडी बिहान २ बजेदेखि ८ बजेसम्म ल्याण्डफिल साइटमा जाने गरेका छन् ।
पासाङ ल्हामु राजमार्गअन्तर्गत मुड्खु तीनपिप्ले सडक निर्माण कार्यलाई सहज बनाउन समय छुट्याइएको हो ।
स्थानीयले सडक कालोपत्रे हुनुपर्ने माग राखेर चैत १८ गतेदेखि दोस्रो पटक अवरोध गरेका थिए । सडक निर्माण कम्पनीले कालोपत्रे कार्यलाई सञ्चालन गर्ने प्रतिबद्धता जनाएपछि चैत २७ गतेबाट कामलाई सहज बनाउन बिहानको समयमा मात्र फोहोर ढुवानी गर्न थालिएको छ ।
फोहोरको आंशिक व्यवस्थापन गर्न थालिएको ३ दिनमा ३४० ट्रक फोहोर ल्याण्डफिल साइटमा लगिएको वातावरण तथा कृषि विभागका निमित्त प्रमुख सरिता राईले जानकारी दिए । उनका अनुसार शुक्रवार बिहान ८ बजेसम्ममा १७२ वटा ट्रक फोहोर बोकेर साइटमा पुगेका छन् ।
महानगरको वातावरण व्यवस्थापन विभागका अनुसार सडक निर्माणका लागि माग गर्दै स्थानीयले फागुन र चैत महिनामा ३ पटक फोहोर लैजान अवरोध गरे । यसअवधिका ३३ दिन फोहोर संकलन हुन सकेन ।
यसबीच फागुन २६ गते प्रधानमन्त्री तथा मन्त्रिपरिषद्को कार्यालयले शहरी विकास मन्त्रीको संयोजकत्वमा उच्च स्तरीय समिति गठन गर्यो । ल्याण्डफिल साइटमा देखिएका समस्या समाधानका लागि यसअघि गरिएका प्रतिबद्धताको कार्यान्वयन, साइट सञ्चालनमा सहजीकरण, समन्वय र अनुगमन गर्न समिति गठन गरिएको हो । यही दिन काठमाडौं महानगरका प्रमुख प्रशासकीय अधिकृतको संयोजकत्वमा र्यापिड एक्सन टाक्सफोर्स गठन भयो । फोहोर व्यवस्थापनका लागि स्थलगत अवस्था मिलाउन तथा फोहोर व्यवस्थापन सम्बन्धी कानूनी र व्यावहारिक समस्यामा समाधानमा सहजीकरण गर्न यो फोर्स बनाइएको हो ।
उपत्यकाका सबै नगरबाट दैनिक उत्पादन हुने करीब १ हजार २०० मेट्रिक टन फोहोर ल्याण्डफिल साइटमा व्यवस्थापन हुने गरेको छ । जसमध्ये करीब ५४५ मेट्रिक टन फोहोर काठमाडौं महानगरको हो ।
‘शहरको फोहोर व्यवस्थापन गर्न नियमित कार्य सञ्चालन हुनुपर्छ । आंशिक काम गर्दा फोहोरको मात्रा उठाउन कठिन हुन्छ,’ निमित्त विभागीय प्रमुख राई भन्छन्, ‘हामीले नियमित काम गर्न पायौं भने ३ दिनभित्र शहरको सबै फोहोर उठाइसक्छौं । हामी फोहोर संकलनमा लागिरहेका छौं । पूर्ण क्षमतामा काम गर्न नपाएपछि समस्या देखिएको हो । यो समस्याको समाधान हामीबाट मात्र सम्भव छैन । अहिलेको समस्याको मुल कारण सडक हो । नेपाल सरकारले यसलाई छिटोभन्दा छिटो निर्माण सम्पन्न गरिदिनुपर्छ ।’
