१० असार २०८३, बुधबार
मेलम्चीको पानी काठमाडौँ उपत्यकामा वितरण शुरू भएको छ ।
खानेपानीमन्त्री उमाकान्त चौधरीले आइतबार काठमाडौँको नयाँ बानेश्वरस्थित मीनभवन वितरण केन्द्रबाट मेलम्चीको प्रशोधित पानी वितरण सुरु गरे ।
घर–घरका धारामा पठाइएको प्रशोधित पानी पूर्ण रूपमा शुद्ध रहेको जनाइएको छ ।नेपाल सरकारले पूर्वघोषणा गरेबमोजिम गत चैत २९ गते मेलम्ची खोलाको पानी सुन्दरीजलस्थित प्रशोधन केन्द्रमा पथान्तरण भएको थियो ।
त्यसरी आएको पानीको गुणस्तर र परीक्षण पूरा गरी पिउनयोग्य बनाएर वितरण गरिएको खानेपानी मन्त्रालयले जनाएको छ । वि.सं. २०४८ सालको प्रतिनिधि सभाको चुनावमा तत्कालीन प्रधानमन्त्री कृष्णप्रसाद भट्टराईले मेलम्चीको पानी काठमाडौँ उपत्यका ल्याउने प्रतिबद्धता व्यक्त गरेका थिए ।
खानेपानीमन्त्री चौधरीले आइतबार पत्रकार सम्मेलन गरी सन्त नेता स्वर्गीय भट्टराईको परिकल्पना ३० दशकपछि पूरा गर्न पाउनु आफ्ना लागि गौरवपूर्ण रहेको बताए ।
गत वर्ष मेलम्चीको पानी हतार–हतारमा वितरण गर्दा पूर्ववर्ती सरकारले परिकल्पनाकार स्वर्गीय भट्टराईको नामसमेत उच्चारण नगरी पूर्वाग्राही सोच र गलत संस्कार प्रदर्शन गरेकोमा मन्त्री चौधरीले दुःख व्यक्त गरे । गोरखापत्र दैनिकमा खबर छ ।
