०५ असार २०८३, शुक्रबार
चितवनको भरतपुर महानगरपालिकाको भित्रि सडकमा दूध बोकेको ट्रयांकरले साइकल यात्रीलाई ठक्कर दिँदा मृत्यु भएको छ ।
भरतपुर महानगरपालिका–११ शान्ति मार्गमा भोजाडबाट विशालचोकतर्फ आउँदै गरेको बा२क ४५७५ नम्बरको ट्यांकरले सोही दिशाबाट आउँदै गरेको साइकल यात्रीलाई बिहीवार दिउँसो ठक्कर दिएको थियो ।
ठक्करबाट गम्भीर घाइते बाराको महागढीमाई नगरपालिका–५ बस्ने २० वर्षीय प्रमित भनिने आदित्य जैसवालको उपचारका लागि भरतपुर अस्पतालतर्फ ल्याउँदै गर्दा बाटोमानै मृत्यु भएको जिल्ला प्रहरी कार्यालय चितवनले जनाएको छ । कार्यालयका सूचना अधिकारी प्रहरी नायब उपरीक्षक नरहरि अधिकारीका अनुसार साइकललाई ठक्कर दिने ट्रयांकर र चालक प्रहरी नियन्त्रणमा रहेका छन् । मृतकको शव भरतपुर अस्पतालको शव गृहमा राखिएको छ ।
