मतदाता सूचीमा नाम नभएका कारण सप्तरीको रूपनी गाउँपालिकामा अध्यक्ष पदका उम्मेदवारको मनोनयन दर्ता रद्द भएको छ ।

नेपाल कम्युनिस्ट पार्टी (माओवादी केन्द्र)बाट जिल्लाको रूपनी  गाउँपालिका  अध्यक्ष  पदमा  अरुणकुमार  साहले  मनोनयन दर्ता गरेका थिए ।

निर्वाचन आयोगले बिहीबार साहको मनोनयन रद्द गरेको हो । २०७० को संविधान सभा निर्वाचनमा मतदान गरेको ठाउँमा आफ्नो नाम हटेको विषयमा साह आश्चर्यचकित भएका छन् ।

२०७४ को निर्वाचनमा आफू कैदमा भएका कारण आफ्नो  मताधिकार  प्रयोग  गर्न  नसकिएकोले  मतदाता  परिचयपत्र अद्यावधिक हुन नसकेको साहले बताए । जेलबाट  छुटेपछि भुलवश तीन ठाउँबाट फोटोसहितको मतदाता  नामावलीमा  नाम  दर्ता  हुन  पुगेको  साहले  बताए ।

तर दोहोरो मतदाता नामावलीबाट नाम हटाउने क्रममा निर्वाचन आयोगबाट तीनवटै ठाउँको दर्ता हटेको साहले बताए ।

मुख्य निर्वाचन अधिकृतको कार्यालय सप्तरीका अनुसार साहको उम्मेदवारीलाई लिएर बुधवार परेको दाबी विरोधमाथि छानबिन गर्ने क्रममा मतदाता नामावलीमा नाम नै नभेटिएपछि साहको उम्मेदवारी रद्द भएको हो ।