काभ्रे दुर्घटना अपडेट: मृत्यु हुने ५ जनाकै सनाखत

काभ्रेपलाञ्चोकको रोशी गाउँपालिका-११ स्थित बिपी राजमार्गमा बुधवार दिउँसो दुई गाडी आपसमा ठोकिँदा ५ जनाको मृत्यु भएको छ । साथै १८ जना घाइते भएको प्रहरीले जनाएको छ ।

जिल्ला प्रहरी कार्यालयका प्रहरी नायव उपरीक्षक हरि खतिवडाका अनुसार भारतीय तीर्थयात्री लिएर काठमाडौंबाट भारततर्फ जाँदै गरेको यूपी ५८ टी ८१८१ नम्बरको फोर्स गाडी र सिन्धुलीबाट काठमाडौंतर्फ आउँदै गरेको ना १ ज ४२१० नम्बरको टाटासुमो जीप बिपी राजमार्गअन्तर्गत रोशी गाउँपालिका-११ स्थित बढुवेशीमा आपसमा ठोकिँदा जीप सवार पाँच जनाको मृत्यु भएको हो । 

सो घटनामा परी मुत्यु हुनेमा सिन्धुली कमलामाई नगरपालिका–७ बस्ने वर्ष ३० का विक्रम श्रेष्ठ, सोही नगरपालिका–४ बस्ने वर्ष ४५ का हरिबहादुर बल, सुनकोशी गाउँपालिका–१ बस्ने वर्ष ४४ का प्रमिला नेपाली, रामेछाप जिल्ला खाँडादेवी गाउँपालिका–८ बस्ने वर्ष ३० का सम्झना भुसाल र निजको छोरा वर्ष ६ को संगीत भुसाल रहेको प्रहरीले जनाएको छ ।

सो दुर्घटनामा परी १८ जना भएको र उनीहरूको धुलिखेल अस्पतालमा उपचार भइरहेको प्रहरीले जनाएको छ ।

प्रहरीले दुवै गाडीलाई नियन्त्रणमा लिएर घटनाको थप अनुसन्धान गरिरहेको प्रहरी नायव उपरीक्षक खतिवडाले बताए ।