काठमाडौं, ३० असार –गृहमन्त्री जनार्दन शर्मा श्रीलंकाको कोलोम्बोमा सम्पन्न आठौं सार्क राष्ट्रहरुको गृहमन्त्रीस्तरीय सम्मेलनमा सहभागी भई शुक्रवार स्वदेश फर्केका छन् ।
त्रिभुवन विमानस्थलमा पत्रकारहरुसँग कुरा गर्दै गृहमन्त्री शर्माले बैठकमा सार्क राष्ट्रहरुका नागरिकहरुले सार्क राष्ट्रहरुमा अवागमन गर्दा भिषा प्रकृयालाई सरलीकरण गर्ने निर्णय गरेको जानकारी दिए ।
मन्त्री शर्माले सार्क भिषा एक्जीम्सन स्टिकर स्किमको विकास गर्ने विषयमा छलफल भएको बताउदै कार्यान्व्यनमा जानेगरी बाँकी कार्य छिटो सम्पन्न गर्ने बताए ।
बैठकमा सार्क राष्ट्रहरुमा रहेका प्रहरी सँगठनबिच सहयोग र समझदारी विकास गर्न सार्क राष्ट्रहरुका प्रहरीहरुको सम्मेलन आगामी सेप्टेम्बर महिनामा नेपालमा आयोजना गर्ने निर्णय भएको छ ।
सम्मेलनमा भाग लिन गृहमन्त्री शर्मा, सचिव लोकदर्शन रेग्मी, प्रवक्ता दिपक काफ्ले गत मंगलबार श्रीलंका प्रस्थान गरेका थिए ।
गृहमन्त्री शर्माले श्रीलंकाका राष्ट्रपति, प्रधानमन्त्री, कानुन र व्यवस्था मन्त्री लगायतका उच्चपदस्त अधिकारीहरुसँग भेटघाट गरेका थिए ।
